Մարտին նախատեսված «Արեւմտահայերի ազգային համագումար» միջազգային հասարակական կազմակերպության 4-րդ համագումարին Փարիզում Հայոց ցեղասպանության վերաբերյալ մշակված իրավական պահանջներ կներկայացվեն: Այդ մասին NEWS.am-ի եւ Tert.am-ի թղթակիցների հետ զրույցի ընթացքում հայտարարեց Հայաստանում «Արեւմտահայերի ազգային համագումար» միջազգային հասարակական կազմակերպության նախագահ, ԲՀԿ խմբակցության պատգամավոր Արագած Ախոյանը:
Նրա խոսքով՝ Հայաստանը՝ որպես պետություն, ունի իր արտաքին ու ներքին քաղաքականությունը, սակայն իրավական դաշտում այդ պահանջները իրավասու են ներկայացնել միայն հայրենազուրկ մարդկանց իրավահաջորդները: «Սա ես չեմ ասում, սա ասում են իրավաբանները: Սակայն մենք աշխատանքի ճիշտ բաժանում պետք է իրականացնենք: Պետությունն իր ներքին ու արտաքին քաղաքականությամբ եւ մենք՝ որպես Օսմանյան կայսրության նախկին քաղաքացիներ, ունենք միեւնույն խնդիրները, ուստի անհրաժեշտ է ճիշտ իրավական հիմքեր դնել այս խնդիրների լուծելման նպատակով: Մենք շուտով կմշակենք պահանջներ եւ կներկայացնենք ժողովրդի դատին», - նշեց Ախոյանը:
Պատգամավորը հավելեց, որ այդ պահանջները, իհարկե, պետք է խելամտության սահմաններում լինեն: «Մեր իրավունքների եւ ունեցվածքի վերականգնման կապակցությամբ մենք պետք է ճիշտ պահանջներով ելույթ ունենանք դատական գործընթացներում, եւ այդ գործընթացները պետք է սկսել ոչ թե ինչ-որ այլ երկրներում, այլ հենց Թուրքիայում», - ընդգծեց Արագած Ախոյանը՝ միաժամանակ հավելելով որ դեմ է հատվածական պահանջների ներկայացմանը:
