Հոկտեմբերի 24-ի Ազատության հրապարակում նախատեսված հանրահավաքին ժողովուրդը կպաշտպանի իր իրավունքները: Այդ մասին այսօր՝ հոկտեմբերի 20-ին, խորհրդարանում հայտարարեց ՀԱԿ խմբակցության ղեկավար Լեւոն Զուրաբյանը:
Խոսելով խորհրդարանական եռյակի՝ («Ժառանգություն», ԲՀԿ, ՀԱԿ) հոկտեմբերի 10-ին կայացած վերջին հանրահավաքի մասին՝ Զուրաբյանը ասաց, որ այդ օրը ժողովուրդը սկիզբ դրեց իրավունքների պաշտպանության նոր շարժմանը, որն այլեւս ոչ մեկի թույլ չի տա խախտել: «Եվ գիտեք, եթե ժողովուրդը բարձրանում է, մարդու իրավունքները դառնում են պաշտպանված: Իսկ ժողովուրդը բարձրացավ, եւ հոկտեմբերի 24-ին կպաշտպանի իր իրավունքները, եւ դեռ ինչպես կպաշտպանի: Դրանից հետո բոլորը կհասկանան՝ ինչ է նշանակում ազատություն, ժողովրդավարություն եւ հարգանք մարդու իրավունքների նկատմամբ», - հավաստիացրեց Զուրաբյանը: