Զարմանալի է՝ 2013թ. ամփոփող իր զեկույցում Հայաստանի օմբուսմենն ինչո՞ւ չանդրադարձավ մարտի 1-ի սպանությունների հարցին: Այդ մասին այսօր՝ հոկտեմբերի 20-ին, խորհրդարանում հայտարարեց Հայ ազգային կոնգրես խմբակցության ղեկավար Լեւոն Զուրաբյանը:
Նա նշեց, որ նույնիսկ ՄԱԿ-ի Մարդու իրավունքների հանձնակատարն է այդ հանցագործությանը ուշադրություն դարձրել: «Նա պահանջել է, վերջապես ճանաչել այդ սպանությունները, իսկ զոհվածների հարազատներին փոխհատուցում վճարել: Ինչո՞ւ դուք այդ մասին չեք խոսում այդ զեկույցում», - հայտարարեց Զուրաբյանը՝ դիմելով օմբուդսմեն Կարեն Անդրեասյանին:
Նկատենք, որ 2 շաբաթ առաջ՝ իր զեկույցի քննարկմանը, Անդրեասյանը հայտարարել էր. «Մարտի 1-ի էջը փակ չէ, քանի դեռ մեղավորները չեն պատժվել»:
Հիշեցնենք, որ 2008թ. մարտի 1-ին իշխանությունը բռնի ուժ գործադրեց ընդդիմության ցույցի մասնակիցների նկատմամբ, զոհվեց 8 ցուցարար եւ ներքին զորքերի երկու ծառայող: Մարդկանց սպանության համար մինչ այժմ ոչ ոք չի պատժվել:
