Երեւանում 15-ամյա աղջկան առեւանգողները երեք հոգի էին, որոնց այժմ որոնում է ոստիկանությունը: Այս մասին հայտնեցին NEWS.am-ի աղբյուրները: Մեր տեղեկություններով՝ նրան առեւանգել են խորթ եղբայրը ու նրա ընկերները: Աղջկան առեւանգել են, կապկպել, սպառնացել, որ հորը կսպանեն, սակայն նրան որեւէ այլ վնաս չեն հասցրել:
Խնդիրն այն է, որ աղջկա հայրը նախկինում ամուսնացած է եղել եւ նրա որդին տարիներ շարունակ ապրել է Գերմանիայում: Դրանից հետո տղամարդը նորից է ամուսնացել եւ այժմ բազմազավակ ընտանիքի հայր է: NEWS.am-ի աղբյուրները հայտնեցին, որ փախուստը կապված է կենցաղային վեճի հետ: Հնարավոր է դրա հիմքում ժառանգություն կիսելու հարց լինի: Թեեւ աղջիկը եւ նրա ընտանիքը ապրում են սոցիալապես ոչ այդքան էլ ապահով պայմաններում, բայց մեր տեղեկություններով, հայրը 4 սենյականոց բնակարան ունի: Չի բացառվում, որ այդ բնակարանից նրա զավակը ուզում է բաժնեմաս ունենալ եւ հենց դա էլ ընկած է առեւանգման հիմքում:
Ավելի վաղ NEWS.am-ը հայտնել էր, որ հոկտեմբերի 19-ին, «Էրեբունի» բժշկական կենտրոնից ահազանգ է ստացվել, որ Տիգրան Մեծի պողոտայից իրենց մոտ է տեղափոխվել կապկպված մի աղջիկ: Վերջինս հայտարարել է, որ իրեն առեւանգել է եղբոր ընկերը՝ մի քանի այլ անձանց հետ միասին: Տարել են, սպառնացել, որ հորը կսպանեն, այնուհետեւ նորից բերել եւ կապկպված վիճակում թողել Տիգրան Մեծի պողոտայում:Կատարվում է հետաքննություն: