Ձնահավաք մեքենայի վարորդը, որին բախվել է Total նավթային ընկերության նախագահի թեթեւ շարժիչով ինքնաթիռը, հարբած է եղել: Այս մասին տեղեկացնում է «Իզվեստիա»-ն՝ վկայակոչելով Ռուսաստանի Քննչական կոմիտեին:
«Ներկայում քննչական-օպերատիվ խումբն ուսումնասիրում է դեպքի վայրը, օդանավի տեխնիկական փաստաթղթերը, լիցքավորողից վառելիքի փորձանմուշներ են վերցվում, որպես ականատես հարցաքննվում են «Վնուկովո» օդանավակայանի աշխատակիցները: Անհրաժեշտ հետաքննական գործողությունների համալիր է կազմակերպվել՝ ուղղված կործանման բոլոր հանգամանքների եւ պատճառների բացահայտմանը»,- նշում է աղբյուրը:
Պատահարի վարկածներից առաջնային է դիտարկվում դիսպետչերների սխալն ու ձնահավաք մեքենայի վարորդի գործողությունները: Բացի այդ, ստուգվելու են նաեւ եղանակային անբարենպաստ պայմանների եւ օդաչուների սխալների վարկածները:
Հիշեցնենք, որ հոկտեմբերի 21-ի առավոտյան «Վնուկովո»-ում ինքնաթիռ է կործանվել, որում գտնվել է նավթային խոշորագույն Total ընկերության տնօրենների խորհրդի 63-ամյա ղեկավար Քրիստոֆ դը Մարժերին: Ավիապատահարի հետեւանքով 5 մարդ է զոհվել. ուղեւորն ու օդանավի անձնակազմի երեք անդամները, ինչպես նաեւ ձնահավաք մեքենայի վարորդը:
