Վանաձորում հոկտեմբերի 12-ին դանակահարության պատճառով մահացած 15-ամյա Դավիթ Հովակիմյանի գործով կալանավորված՝ Լոռու մարզի գլխավոր վիրաբույժ Վլադիմիր Ղուկասյանի խափանման միջոց կալանքը եւս 2 ամսով երկարացնելու՝ քննիչի միջնորդությունը քկննվի այսօր՝ հոկտեմբերի 21-ին, Լոռու մարզի ընդհանուր իրավասության դատարանում: Այս մասին NEWS.am-ին ասաց մեղադրյալի փաստաբան Ռուբեն Հակոբյանը:
«Նախաքննությունը շարունակվում է, ըստ երեւույթին այսօր նորից կալանքի ժամկետը երկարացվելու է: Դատախազությանը հաճոյանալու համար դատարանն ամեն ինչ անում է, քաղաքացիական արիություն չունի՝ ինքնուրույն որոշում կայացնելու, դատարանը նայում է միայն դատախազության ժեստիկուլյացիային: Սա իրավաբանություն չէ, այլ վրեժխնդրություն»,- ասաց փաստաբանը:
Նրա խոսքով՝ նախաքննական մարմինը չի պահպանում օրենքի տարրական նորմերը եւ ամեն ինչ անում է մեղադրող կողմին հաճոյանալու համար:
Նշենք, որ ըստ նախնական մեղադրանքի՝ Վլադիմիր Ղուկասյանը թերացել է իր աշխատանքում, որն էլ առաջացրել 15-ամյա տղայի մահը:
Հիշեցնենք, որ ըստ ոստիկանության՝ հոկտեմբերի 12-ին, ժամը 19.35-ին, «Վանաձոր» բժշկական կենտրոն է տեղափոխվել Երեւանի բնակիչ, 15-ամյա Դավիթ Հովակիմյանը՝ «կրծքավանդակի ծակած վերք» ախտորոշմամբ: Նույն օրը ժամը 22.00-ի սահմաններում Դ. Հովակիմյանը հիվանդանոցում մահացել է: Հոկտեմբերի 13-ին, ժամը 01.50-ին սպանությունը կատարելու կասկածանքով իր բնակարանից բերման է ենթարկվել 1991թ. ծնված, նախկինում դատապարտված Կարեն Կ.-ն՝ «Քուրդ» մականունով: Պարզվել է, որ նա հոկտեմբերի 12-ին ժամը 19.20-ի սահմաններում Վանաձորի Կ. Դեմիրճյան փողոցի հարեւանությամբ գտնվող այգում, վիճաբանության ժամանակ, դանակով հարվածել է Դ. Հովակիմյանին, որից հետո վերջինս հիվանդանոցում մահացել է: Գործն արդեն դատարանում է: Նշենք, որ Դավիթը Վանաձոր էր մեկնել՝ հանդբոլի Հայաստանի առաջնության եզրափակիչ մրցաշարին մասնակցելու համար: