Բրազիլական Ամազոնի ավազանի արեւմտյան հատվածում թռչնակեր-սարդի նոր տեսակ են հայտնաբերել, որին կոչել են «Բիթլզ» խմբի հիմնադիրներից Ջոն Լենոնի պատվին՝ Bumba lennoni: Այս մասին գրում է LifeNews-ը:
Աղբյուրի տվյալներով, սարդը պատկանում է Theraphosidae ընտանիքին: Սարդին անվանակոչել են բրազիլական Էմիլիո Գոելդիի թանգարան-ինստիտուտի գիտնականները: «Bumba անունը վերցվել է բրազիլական ազգային ավանդույթից: Boi-bumba փառատոնն ամեն տարի ամռանն անցկացվում է Բրազիլիայի հյուսիսում եւ հյուսիս-արեւելքում»,- նշում է աղբյուրը:
Սարդը պաշտպանական թունավոր մազիկներ ունի, որոնք գրգռում են մաշկը կամ զգայուն այլ հյուսվածքները: Գիտնականները ենթադրում են, որ Լենոնի անունը կրող սարդը հիմնականում գիշերային կենսակերպ է վարում: