Փրկարար ծառայությունը հոկտեմբերի 21-ին, ժամը 10.18-ին տեղեկատվություն է ստացել, որ Երեւան-Գյումրի ավտոճանապարհին` Սառնաղբյուր գյուղի մոտակայքում, վթար է եղել:

Դեպքի վայր է մեկնել մեկ մարտական հաշվարկ:

Պարզվել է, որ  Մ-1 միջպետական ավտոճանապարհի Գյումրի-Երեւան հատվածի 37-րդ կմ-ում բախվել են «Օպել» մակնիշի 30 OS 706 պ/հ (վարորդ` Հ. Մ., ծնվ. 1974 թ.) եւ «ՎԱԶ-2107» մակնիշի 34 US 926 պ/հ (վարորդ` Է. Հ., ծնվ. 1957 թ.) ավտոմեքենաները, ինչից «Օպել» մակնիշի ավտոմեքենան դուրս է եկել ավտոճանապարհի երթեւեկելի հատվածից եւ հայտնվել հանդամասում:

Մինչ հրշեջ-փրկարարների կանչի վայր հասնելը` ՀՓՋ-ի հրամանատար փ/ծ փոխգնդապետ Այվազյանը «Օպել» մակնիշի ավտոմեքենայից դուրս է բերել ուղեւորներ Է. Ս.-ին (ծնվ. 1990 թ.), Ա. Ս.-ին (ծնվ. 1947 թ.) եւ Մ. Ս.-ին (ծնվ. 1949 թ.), հոսանքազրկել ավտոմեքենան եւ դադարեցրել գազի արտահոսքը:

Ուղեւորներ Մ. Ս.-ն եւ Է. Ս.-ն տեղափոխվել են Գյումրի քաղաքի ԲԿ, որտեղ տուժածների առողջական վիճակը բժիշկները գնահատել են բավարար: