Գյումրիի նախկին քաղաքապետ Վարդան Ղուկասյանի դստեր փեսացուին սպանելու համար 15 տարվա ազատազրկման դատապարտված Հարություն Սարգսյանի պաշտպանը դիմել է Վճռաբեկ դատարան` բեկանելու առաջին ատյանի եւ Վերաքննիչ քրեական դատարանների որոշումը, սակայն դեռ պատասխան չկա: Այսօր` հոկտեմբերի 21-ին, լրագրողների հետ հանդիպման ժամանակ Հարություն Սարգսյանի փաստաբան Լուսինե Սահակյանն անդրադարձավ դեպքի մանրամասների, նախաքննական մարմնի սխալների եւ կամայականությունների մասին:
«Կարեն Եսայանը փորձում էր նշանադրվել Վարդան Ղուկասյանի դստեր հետ, սակայն Վարդան Ղուկասյանն անընդհատ մերժում էր, ամիսներ անց համաձայնվում է Ղուկասյանը եւ նշանադրության օրը նշանակվում է ապրիլի 12-ին: Մինչեւ նշանադրությունը Կարեն Եսայանին սկսում են հետապնդել, նա անընդհատ ահաբեկված վիճակում է գտնվում: Նշանադրության նախորդ օրը Կարեն Եսայանը մեքենան տանում է այն լվանալու, որից հետո, ըստ նախաքննական մարմնի, նա գնացել է տուն, սակայն դատավարության ընթացքում արդեն պարզվեց, որ Կարենը գնացել է կիսաքանդ տուն, որտեղ հանդիպել է Սպարտակ Ղուկասյանի եւ նրա ընկերների հետ: Սպարտակ Ղուկասյանը պահանջել է նշանադրությանը չգնալ` ասելով` կքոռանաս, բայց քրոջս չես տեսնի: Այնուհետեւ արդեն Վարդան Ղուկասյանն արդեն Սպարտակ Ղուկասյանին հիշեցնում է իր եղբոր դստեր հետ տեղի ունեցած ողբերգությունը. Վարդան Ղուկասյանի եղբոր դուստրը տարիներ առաջ ցանկացել է նշանադրվել մի տղայի հետ, սակայն Վարդան Ղուկասյանը թույլ չի տալիս, որից հետո այդ տղան սպանվում է, իսկ աղջիկն էլ ինքնասպանություն է գործում: Այս դեպքն էլ հետ չի պահում Սպարտակ Ղուկասյանին եւ նա խոսում է Կարենի հետ»,- ասաց Լուսինե Սահակյանը:
Փաստաբանի խոսքով` ավելի քան տարօրինակ է, որ Կարեն Եսայանի անհետանալուց ընդամենը 40 րոպե անց Վարդան Ղուկասյանի կողմնակիցները սկսում են նրան որոնել, հայտնաբերում են տեսագրություններ:
«Իրականում ոստիկանությունը ցանկանում էր, որ այս ամեն ինչը բարդվեր հենց Հարություն Սարգսյանի վրա: Աշոտ Կարապետյանն ու Բաբակեխյանն էլ անձամբ ծեծի են ենթարկել Հարություն Սարգսյանին` պահանջելով ընդունել, որ ինքն է սպանել Կարեն Եսայանին: Այս ամբողջ ընթացքում նաեւ Հարությունի հարազատներին եւ ընկերներին են հետապնդել, հրավիրել ոստիկանություն»,- ավելացրեց փաստաբանը:
Լուսինե Սահակյանը նշեց, որ ոչ Շիրակի մարզի ընդհանուր իրավասության, ոչ էլ Վերաքննիչ քրեական դատարանները հաշվի չեն առել ձեռք բերված ոչ մի ապացույց:
«Հայաստանի Հելսինկյան կոմիտեի» ղեկավար Ավետիք Իշխանյանն էլ ընդգծեց, որ մեծ ապօրինություններ են տեղի ունեցել. «Նման դեպքեր շատ հաճախ են լինում, սակայն այնքան դժվար է նրանց անմեղությունն ապացուցել: Սակայն այս դեպքում նախաքննական մարմնի բերած բոլոր ապացույցներն առաջին ատյանի դատարանում հերքվել են եւ չկա ապացույց, որ Հարություն Սարգսյանն է սպանել Կարեն Եսայանին: Չես հասկանում, թե ինչի հիման վրա են երկու աստիճանի դատարան որոշել, որ հենց Հարությունն է մեղավոր»:
Ավելի վաղ NEWS.am-ը հայտնել էր, որ 2013թ. ապրիլի 12-ին Գյումրիում սպանվել է այն ժամանակ Գյումրիի քաղաքապետ Վարդան Ղուկասյանի դստեր փեսացուն` 27-ամյա Կարեն Եսայանը, որն ապրիլի 13-ին պետք է նշանվեր քաղաքապետի դստեր հետ: Շիրակի մարզի ընդհանուր իրավասության դատարանը սպանության համար մեղավոր է ճանաչել եւ 15 տարվա ազատազրկման դատապարտել Անիի նախկին ոստիկանապետ Սամվել Սարգսյանի որդուն՝ Հարություն Սարգսյանին։ Ըստ մեղադրական եզրակացության, նա խանդի հողի վրա է կատարել սպանությունը։ Սարգսյանները պնդում են, որ իրենց որդին անմեղ է, իսկ դատավճիռն` անարդարացի: Նրանք առաջին ատյանի դատարանի որոշումը բողոքարկել էին Վերաքննիչ քրեական դատարան, որն անփոփոխ էր թողել դատավճիռը:
