Գյումրիի նախկին քաղաքապետ Վարդան Ղուկասյանի դստեր փեսացուին սպանելու համար 15 տարվա ազատազրկման դատապարտված Հարություն Սարգսյանը չի ճանաչել Կարեն Եսայանին եւ Մանյա Ղուկասյանին, սակայն դատարանն այս փաստը հաշվի չառավ: Այս մասին այսօր` հոկտեմբերի 21-ին, լրագրողների հետ զրույցում ասաց Հարություն Սարգսյանի փաստաբան Լուսինե Սահակյանը` մեկնաբանելով Շիրակի մարզի ընդհանուր իրավասության եւ Վերաքննիչ քրեական դատարանների կայացրած որոշումները:
«Ըստ մեղադրական եզրակացության` Հարությունը Կարեն Եսայանին սպանել է խանդի հողի վրա, սակայն դատավարության ընթացքում ապացուցվել է, որ Հարությունը չի ճանաչել նրանց: Իմ պաշտպանյալն ընկերուհի է ունեցել եւ պատրաստվում էր ամիսներ անց ամուսնանալ նրա հետ, գործում առկա է Հարություն Սարգսյանի եւ նրա ընկերուհու խոսակցությունը, սակայն այս փաստն էլ դատարանները հաշվի չառան»,- ասաց Լուսինե Սահակյանը:
Փաստաբանի խոսքով` վարույթն իրականացնող մարմինը պարտավոր էր քննություն իրականացնել եւ պարզել, թե սպանության նախորդ օրը ինչու է Վարդան Ղուկասյանի որդին` Սպարտակ Ղուկասյանը, վիճել Կարեն Եսայանի հետ: Մինչդեռ երկու աստիճանի դատարաններն էլ հրաժարվել են նույնիսկ վկայություն տալու համար դատարան հրավիրել Սպարտակ Ղուկասյանին:
Նշենք, որ Հարություն Սարգսյանի պաշտպանը դիմել է Վճռաբեկ դատարան` բեկանելու առաջին ատյանի եւ Վերաքննիչ քրեական դատարանների կայացրած որոշումը: Առ այսօր Վճռաբեկ դատարանը վարույթ չի ընդունել գործը: Լուսինե Սահակյանը կարծում է, որ այս դատարանը պետք է գոնե իր փիառի համար արդարացնի Հարություն Սարգսյանին:
Ավելի վաղ NEWS.am-ը հայտնել էր, որ 2013թ. ապրիլի 12-ին Գյումրիում սպանվել է այն ժամանակ Գյումրիի քաղաքապետ Վարդան Ղուկասյանի դստեր փեսացուն` 27-ամյա Կարեն Եսայանը, որն ապրիլի 13-ին պետք է նշանվեր քաղաքապետի դստեր հետ: Շիրակի մարզի ընդհանուր իրավասության դատարանը սպանության համար մեղավոր է ճանաչել եւ 15 տարվա ազատազրկման դատապարտել Անիի նախկին ոստիկանապետ Սամվել Սարգսյանի որդուն՝ Հարություն Սարգսյանին։ Ըստ մեղադրական եզրակացության, նա խանդի հողի վրա է կատարել սպանությունը։ Սարգսյանները պնդում են, որ իրենց որդին անմեղ է, իսկ դատավճիռն` անարդարացի: Նրանք առաջին ատյանի դատարանի որոշումը բողոքարկել էին Վերաքննիչ քրեական դատարան, որն անփոփոխ էր թողել դատավճիռը:
