Գյումրիի քաղաքապետ, ԲՀԿ-ական Սամվել Բալասանյանը հոկտեմբերի 20-ին վերադարձել է արձակուրդից, սակայն հայտնի չէ` նա հոկտեմբերի 24-ին կմասնակցի խորհրդարանական ոչ իշխանական եռյակի` ԲՀԿ-ի, ՀԱԿ-ի եւ «Ժառանգության» համատեղ հանրահավաքին, թե ոչ: NEWS.am-ի թղթակցի հետ զրույցում քաղաքապետի մամուլի խոսնակ Լիլիթ Մակարյանը նշեց, որ ինքն իրավասու չէ նման հարցերի պատասխանել:
«Քաղաքական, կուսակցական հարցերին պատասխանելու իրավասություն ես չունեմ: Բազմիցս ասել եմ, որ քաղաքապետարանն ապաքաղաքական կառույց է»,- ասաց Լիլիթ Մակարյանը:
Նշենք, որ ԲՀԿ-ական Սամվել Բալասանյանն արձակուրդի էր մեկնել հոկտեմբերի 8-ին, հենց այն օրը, երբ եռյակը մարզային իրազեկման հանրահավաք էր անցկացնում Գյումրիում: Ըստ մամուլում տարածված տեղեկությունների` ԲՀԿ-ական քաղաքապետն արձակուրդի էր մեկնել` հոկտեմբերի 10-ի համապետական հանրահավաքի չմասնակցելու համար:
