NEWS.am-ին նոր մանրամասներ են հայտնի դարձել Երեւանում 15-ամյա աղջկա առեւանգման դեպքով: Մեր աղբյուրները հայտնեցին, որ պարզվում է աղջիկը ստել է` իր առեւանգման մասին հանրությանը տեղեկացնելով, նա ընդամենը բեմականացրել է իր առեւանգումը եւ դա ինչ-ինչ պատճառներով բարդել խորթ եղբոր, նրա ընկերների վրա: Բանն այն է, որ երիտասարդ աղջիկը ինքն է մտել նկուղ, իրեն կապկել, հայտնվել փողոցում, գնացել հիվանդանոց, որտեղից էլ ահազանգ է ստացվել ոստիկանություն: Ինչն էր 15-ամյա աղջկա նման քայլի դիմելու պատճառը, ոչ ոք չի կարող ասել, հավանաբար խնդիրը հոգեբանական է: Նա ապրում է բազմազավակ ընտանիքում, 12 երեխա են, սոցիալապես անապահով պայմաններում: Գուցե այդպես փորձել է իր վրա ուշադրություն գրավել:
Ի դեպ, նրա խորթ եղբայրը առայժմ չի հայտնաբերվել, հավանաբար գտնվում է Գերմանիայում, վերջինիս հետախուզման մեջ է բանակից խուսափելու համար:
Ավելի վաղ NEWS.am-ը հայտնել էր, որ հոկտեմբերի 19-ին, «Էրեբունի» բժշկական կենտրոնից ահազանգ է ստացվել, որ Տիգրան Մեծի պողոտայից իրենց մոտ է տեղափոխվել կապկպված մի աղջիկ: Վերջինս հայտարարել է, որ իրեն առեւանգել է եղբոր ընկերը՝ մի քանի այլ անձանց հետ միասին: Տարել են, սպառնացել, որ հորը կսպանեն, այնուհետեւ նորից բերել եւ կապկպված վիճակում թողել Տիգրան Մեծի պողոտայում:Կատարվում է հետաքննություն: