Հայաստանի ՊՆ N զորամասում 2013թ. դեկտեմբերի 10-ին ինքնասպան եղած զինծառայող, Չինարի գյուղի բնակիչ, շարքային Վանիչկա Հովակիմյանին գործով դատապարտվածների Վերաքննիչ բողոքի քննությունն այսօր՝ հոկտեմբերի 21-ին, ՀՀ վերաքննիչ դատարանում հետաձգվեց՝ դատավորների մեկի բացակայության պատճառով: Հիշեցնենք, որ Վանիչկային ծառայակիցները հալածել ու ծաղրուծանակի էին ենթարկել՝ նրան մեղադրելով ծառայակցի հեռախոսը գողանալու մեջ։ Վանիչկան, չկարողանալով ապացուցել իր անմեղությունը, ինքնասպան էր եղել։
Նարեկ Միտոյանի փաստաբան Ավետիս Քալաշյանը NEWS.am-ի հետ զրույցում ասաց, որ իր պաշտպանյալի արարքում հանցակազմ չի տեսնում, եւ Վերաքննիչ դատարանից իր պաշտպանյալի համար արդարացում է պահանջում: Նրա խոսքով՝ գործը նախաքննության ընթացքում շատ կասկածելի պայմաններում օբյեկտիվորեն չի քննվել:
«Նախ Վանիչկա Հովակիմյանի մահվան մեջ առաջին մեղավոր անձի՝ զինծառայող Գրիգոր Բաբախանյանի արարքներին ոչ մի իրավական գնահատական չի տրվել: Գրիգոր Բաբախանյանն այն անձն է, որը գողացել է հեռախոսը, եւ ինքն էլ դրդել է, որ իր ծառայակիցները մահացած զինծառայողին մեղադրեն գողության մեջ»,- ասաց պաշտպանը՝ նշելով, որ այս ամենին նախաքննական մարմինը ոչ մի նշանակություն եւ իրավական գնահատական չի տվել, թեեւ առաջին ատյանի դատարանում ապացուցվել է, որ հենց Գրիգորն է գողացել ծառայակցի հեռախոսը։
Նարեկ Միտոյանի հայրն էլ ասաց, որ իր տեղեկություններով, Վանիչկա Հովակիմյանին ոչ ծեծել են, ոչ նվաստացրել, եւ անհասկանալի է, թե ինչու է 50 րոպե տեւած վեճից հետո զինծառայողը ինքնասպանություն գործել:
«Ինչի՞ մի հատ էդ էրեխու հոգեկան կերպարը չեն նայում, հիվանդության թղթերը չեն նայում, նրան բանակ բերողին չեն նայում: Հոգեկանին մոտ հիվանդություն է ունեցել էդ էրեխեն, տենց մարդուն բանակ պետք է չբերեին ընդհանրապես, բանակ է` վիճաբանություն է լինում, հո չե՞ն գնալու ինքնասպանություն գործեն»,-աասաց Գրիգոր Միտոյանը՝ նշելով, որ հեռախոսի իրական գողը ազատության մեջ է. «Եվ այդ գողը, ավազակը, անպետքը այսօր Երեւանում է ծառայում, դատարան էլ հատուկ բերում, տանում են: Վանիչկայի հորեղբոր տղան էր դեռ առաջին ատյանի դատարանից դուրս գալուց դանակը կոխում փորը, մենք ձեռքը բռնեցինք, որ չդանակահարեն»:
Գործով մյուս դատապարտված Պարույր Մկրտչյանի փաստաբան Լեւոն Թորոսյանը NEWS.am-ին ասաց, որ իր պաշտպանյալին 5 տարի, 6 ամսով ազատազրկելը շատ խիստ պատիժ է: Նշենք, որ հենց Պարույր Մկրտչյանի գողացված հեռախոսն էր դարձել ողբերգությամբ ավարտված վեճի պատճառ։
«Պարույր Մկրտչյանին Գրիգոր Բաբախանյանն է ուղղորդել՝ ասելով, որ Վանիչկա Հովակիմյանն է հեռախոսը գողացել, բայց Պարույր Մկրտչյանը Վանիչկային միայն վրդովված ասել է՝ լսի, եթե դու ես տարել, բեր տուր, ես նենց կանեմ, ոչ մեկ չի իմանա, Վանիչկան նորից է ասում, որ ինքը չի գողացել: Իմ պաշտպանյալը բռնում է նրա օձիքից եւ մեկ-երկու անգամ թափահարում է՝ նորից ասելով, որ եթե նա է տարել հեռախոսը, վերադարձնի: Դրանից հետո Վանիչկան դուրս է գալիս, մտնում է զինասենյակ, դուռը հետեւից փակել է տալիս, Գրիգոր Կուրեխյանին պատկանող ինքնաձիգում երեք պատրոն է լիցքավորում եւ դրանով իրեն խփում է»,- պատմեց Լեւոն Թորոսյանը՝ նշելով, որ բացառվում է սպանության վարկածը:
Անդրադառնալով այս պատմությունից «չոր» դուրս եկած Գրիգոր Բաբախանյանին, Լեւոն Թորոսյանն ասաց, որ զինծառայողը շատ ճարպիկ է գտնվել:
«Ինքը բավականին ճարպիկ անձնավորություն է եւ բարձրաստիճան հովանավորներ ունի, ամենայն հավանականությամբ: Էս տղան ինքը գողացել է հեռախոսը, իր մեղքը գցել է ուրիշի վրա, բացի այդ ինքնասպանությունից հետո հեռախոսից ազատվել է՝ այն դնելով այլ զինծառայողի բարձի մեջ, իր վրայից կասկածը հանելու համար»,-ասաց Լեւոն Թորոսյանը:
Հիշեցնենք, որ Արարատի եւ Վայոց Ձորի մարզերի առաջին ատյանի դատարանը գործով մեղադրվող Շմավոն Կուրեխյանին դատապարտել է 7 տարվա, Պարույր Մկրտչյանին՝ 5 տարի 6 ամիս, Արման Մուրադյանին՝ 3 տարվա ազատազրկման։ Նարեկ Միտոյանին դատարանը նշանակել է պայմանական պատիժ։
Ավելի վաղ NEWS.am-ը հայտնել էր, որ դեկտեմբերի 10-ին, ժամը 18:10-ի սահմաններում, ՀՀ ՊՆ N զորամասի տարածքում հայտնաբերվել է ներքին վերակարգում որպես օրապահ ընդգրկված ժամկետային զինծառայող, շարքային Վանիչկա Արամայիսի Հովակիմյանի դին` ծնոտի ստորին շրջանում հրազենային վիրավորումով: Ինքնասպանությունից առաջ Վանիչկան զանգահարել էր հորն ու ասել, որ իրենց այլեւս չեն տեսնի։ Դեկտեմբերի 12-ին գտել են նրա թողած գրությունը. Վանիչկան գրել էր, որ ինքնասպանություն է գործում հեռախոսի պատճառով, որն ինչ-որ մեկը գողացել է ու գցել իր ուսապարկը։
