Տպավորություն է ստեղծվում, որ Հայաստանի կառավարությունը կարդում է ընդդիմության մտքերը: Այդ մասին այսօր՝ հոկտեմբերի 21-ին, խորհրդարանում հայտարարեց ընդդիմադիր պատգամավոր Նիկոլ Փաշինյանը՝ դիմելով ֆինանսների փոխնախարար Վախթանգ Միրումյանին:
Ընդդիմադիրը նշեց, որ կառավարությունը խորհրդարանին է ներկայացրել սահմանամերձ շրջանների աջակցության մասին օրինագիծ՝ չքննարկելով այն իր հետ՝ թեեւ ավելի վաղ խոստացել էր այդ մասին: «Սեպտեմբերի 25-ին վարչապետը Ձեզ հանձնարարեց ուսումնասիրել իմ օրինագիծը եւ խելամիտ առաջարկությունների առկայության դեպքում դրանք ներառել կառավարության օրինագծում: Իսկ այսօր պարզվում է, որ Դուք իմ տեքստը նույնիսկ չեք կարդացել: Այդ ինչպե՞ս եք իմացել՝ իմ առաջարկություններից որոնք են խելամիտ, իսկ որոնք՝ ոչ: Միգուցե իշխանությունը հեռավորության վրա կարդալու հատուկ ունակություններ կամ հատուկ ընկալիչնե՞ր ունի», - ասաց Փաշինյանը:
Ի պատասխան՝ փոխնախարար Վախթանգ Միրումյանը նկատեց, որ Փաշինյանի հետ իր օրինագիծը քննարկել են տարածքային կառավարման նախարարության ներկայացուցիչները:
