ԵՏՄ-ին միանալու պայմանագրի ստորագրումով կտրվում է կապը Հայաստանի ներկայի եւ ապագայի, ներկա եւ ապագա ազատությունների, ներկա եւ ապագա պաշտպանվածության միջեւ: Այս մասին, այսօր՝ հոկտեմբերի 21-ին, ԱԺ-ում հայտարարությունների ժամին իր ելույթում նշել է «Ժառանգություն» խմբակցության քարտուղար Թեւան Պողոսյանը:
Նրա խոսքով՝ ներկայումս, հնարավոր է, տեսանելի են այդ պայմանագրի միայն տնտեսական ասպեկտները, միաժամանակ, չի կարելի մոռանալ քաղաքական բաղադրիչի մասին:
«Հայաստանում կան քաղաքական ուժեր ու կազմակերպություններ, հազարավոր մարդիկ, որոնք դեմ են հանդես գալիս ԵՏՄ-ին եւ նրանք դրա հետ կապված ասելիք ունեն: Մենք պետք է ապահովենք, որ խորհրդարանում նրանք հրապարակեն իրենց դիրքորոշումը»,-ասել է Պողոսյանը:
Նա ընդգծել է, որ այսօրվանից ինքը պատրաստ է հավաքել բոլոր նման կարծիքները, մասնակցել այդ թեմայով քննարկումներին եւ արձանագրել մարդկանց դիրքորոշումները: «Ես գրանցված եմ facebook սոցիալական ցանցում, իմ հեռախոսահամարն է 091 40 37 74, ես պատրաստ եմ լսել բոլորին եւ ներկայացնել ամփոփիչ հասարակական կարծիքը խորհրդարանում»,-ամփոփել է նա: