Ռուսաստանի պետդուման առաջին ընթերցմամբ ընդունել է 2-րդ քաղաքացիության մասին հայտնելու պարզեցված կարգ, հաղորդում է «ՌԻԱ նովոստին»:
Աղբյուրի փոխանցմամբ՝ օգոստոսից գործում է օրենքը, որի շրջանակներում ռուսաստանցիները պետք է միգրացիոն ծառայություններին տեղեկացնեն իրենց այլ երկրի քաղաքացի լինելու մասին: Ընդ որում, նրանք դա պետք է անեին մինչեւ հոկտեմբերի 4-ը:
Նոր օրինագծի համաձայն, արտասահմանում բնակվող ՌԴ քաղաքացիները կարող են իրենց երկրորդ քաղաքացիության մասին ՌԴ իշխանություններին տեղեկացնել նաեւ հոկտեմբերի 4-ից հետո, ՌԴ վերադառնալուց հետո 30 օրվա ընթացքում, իսկ եթե քաղաքացին որոշել է մշտապես բնակվել ՌԴ-ում, ապա՝ 60 օրվա ընթացքում:
Եթե մարդը գտնվում է հիվանդանոցում, նա կարող է մեկ այլ անձի խնդրել հայտնել իր երկրորդ քաղաքացիության մասին: Դրա համար անհրաժեշտ է երաշխավորագիր պատրաստել, որը հաստատված կլինի նոտարի կամ գլխավոր բժշկի կողմից:
Եթե ՌԴ քաղաքացին մշտապես բնակվում է արտերկրում, նա կարող է ընդհանրապես չտեղեկացնել իր երկրորդ քաղաքացիության մասին: