Հայաստանի ֆինանսական շուկայի առաջատար վարկային կազմակերպություններից ՖԻՆՔԱ-ն արդեն 15 տարի է, ինչ գործում է Հայաստանում։ Ինչպես NEWS.am-ին տեղեկացրին ՖԻՆՔԱ-ի մամուլի ծառայությունից, հոկտեմբերի 21-ին Ռոյալ Թուլիփ Գրանդ Հոթել Երևանի «Ձմեռային այգում» կազմակերպված ՖԻՆՔԱ-ի 15-ամյակի միջոցառմանը ներկա են եղել հյուրեր ՀՀ Կենտրոնական բանկից, Հայաստանի բազմաթիվ բանկերից ու վարկային կազմակերպություններից, ՖԻՆՔԱ Ինթերնեյշնլից, Հայաստանում ԱՄՆ-ի  դեսպան Ջոն Հեֆերնը , ինչպես նաև ղեկավարներ ՖԻՆՔԱ-ի մի շարք գործընկեր կազմակերպություններից, ինչպիսիք են IFC-ն, EBRD-ն և այլն:

Իր խոսքում ՖԻՆՔԱ-ի Գլխավոր տնօրեն Հրաչյա Թոխմախյանը նշել է, որ 15 տարիների ընթացքում ՖԻՆՔԱ-ի լավագույն նվաճումը եղել է հաճախորդների տված բարձր գնահատականը և նրանց մեծ վստահությունը կազմակերպության հանդեպ:

Խոսքով հանդես են եկել նաև Հայաստանում Ամերիկայի Միացյալ Նահանգների դեսպան Ջոն Հեֆերնը, ՀՀ Կենտրոնական բանկի նախագահի տեղակալ Ներսես Երիցյանը, ինչպես նաև ՖԻՆՔԱ Հայաստանի Խորհրդի նախագահ և ՖԻՆՔԱ Եվրասիա տարածաշրջանի տնօրենը:

Հիշեցնենք, որ ՖԻՆՔԱ-ն հիմնադրվել է ՖԻՆՔԱ Ինթերնեյշնլ ամերիկյան կազմակերպության կողմից: Ունենալով 27 մասնաճյուղ, որոնց թիվը մինչ տարեվերջ կհասնի մոտ 40-ի` ՖԻՆՔԱ-ն սպասարկում է ավելի քան 56,000 հաճախորդի: