Հայկական «Բիոկաթ» եւ «Բոնիլատ» կաթնամթերքի գործարանների համասեփականատեր Գարիկ Սարուխանյանը պատրաստվում է դատի տալ երեւանյան «Մոսկվիչկա» սուպերմարկետների ցանցին: Երեւանում կայացած «Արմպրոդէքսպո» ցուցահանդեսի ժամանակ NEWS.am-ի թղթակցի հետ զրույցում այս մասին հայտարարեց Գարիկ Սարուխանյանը:
Նրա խոսքով՝ նախկինում սուպերմարկետն այնքան էլ չէր ուշացնում վճարումները, սակայն օգոստոսից դադարել է վճարել, իսկ մենեջերները կապ չեն պահպանում: «Դատարան դիմելուց բացի՝ ինձ ուրիշ ոչինչ չի մնում անել: Ես լրջորեն մտածում եմ այդ մասին»,- հայտարարեց գործարարը:
Հիշեցնենք, որ «Մոսկվիչկա» ցանցը պատկանում է Երեւանի նախկին ոստիկանապետ Ներսիկ Նազարյանի ընտանիքին: Այն ղեկավարում է Նազարյանի որդին՝ Արմենը:
