Ռուսական բանակը կսկսի աղբից մաքրել Արկտիկան, գրում է «Ռոսիյսկայա գազետան»` վկայակոչելով ՌԴ ՊՆ-ն:
«Արդեն հայտնի է, թե ինչպես են այնտեղից դուրս բերելու կուտակված աղբը: Մեր տասնյակ նավեր, որոնք բեռներ են տեղափոխում այդ կղզիներ, վերադառնում են արդեն դատարկ: Ուստի եւ հնարավորություն կա այնտեղից դուրս բերել բոլոր այն առարկաները, որոնք աղտոտում են կղզիները, ուղղակի վնաս հասցնում տարածաշրջանի բնապահպանությանը», - ասել է պաշտպանության նախարար Սերգեյ Շոյգուն:
Նա նշել է, որ աղբի մեջ նկատվում են անցյալ հարյուրամյակի օդանավեր, նավթի տակառներ: Կղզիներից մեկում կուտակվել է շուրջ 70 հազար այդպիսի առարկա:
Թերթը հիշեցնում է, որ ՊՆ-ում ընթացիկ տարին հայտարարվել էր Արկտիկայի տարի: Որոշվել է վերականգնել տասնամյակներ առաջ լքված զինվորական օդանավակայանները Նովոսիբիրսկի կղզիներում եւ Ֆրանց-Իոսիֆի հողում: Համարժեք աշխատանքներ են նախատեսվում նաեւ մի շարք այլ վայրերում։