Ազգային ժողովի «Ժառանգություն» խմբակցության պատգամավոր, պաշտպանության, ազգային անվտանգության եւ ներքին գործերի մշտական հանձնաժողովի անդամ Թեւան Պողոսյանը կասկածում է, որ Եվրասիական տնտեսական միությունը կապահովի Հայաստանի արտաքին եւ ներքին անվտանգությունը:
«Պետք է պարզ գիտակցենք, որ անվտանգությունն առաջին գիծը եւ բանակը չեն միայն: Կարեւոր է նաեւ ներքին անվտանգության խնդիրները` ոստիկանություն, արդարադատություն, դատական համակարգի անկախ աշխատանք, ազգային անվտանգության ծառայություն: Առանց այս հարցերի լուծմանը` չենք կարող խոսել երազած անվտանգության մասին է: Ցավոք սրտի, ԵՏՄ-ին անդամակցության շրջանակներում մեծ կասկած կա, թե ինչ կարող ենք այնտեղից ընդօրինակել, կամ ինչպիսին կլինեն այդ երկրների բարեփոխումները, որ հետո էլ ազդի մեր տարբեր համակարգերի վրա: Մենք պետք է ԵՏՄ-ի հետ համագործակցենք միայն տնտեսապես, իսկ Եվրոպական միության հետ էլ ստորագրենք ասոցացման համաձայնագրի քաղաքական բաղադրիչը»,- այս մասին այսօր` հոկտեմբերի 22-ին, լրագրողների հետ զրույցում ասաց Թեւան Պողոսյանը:
Ընդդիմադիր պատգամավորը կարծում է, որ ԵՄ-ի ասոցացման համաձայնագիրը ստորագրելիս` չպետք է հաշվի առնենք Ղազախստանի, Ռուսաստանի, Բելառուսի դիրքորոշումը:
Նշենք, որ հոկտեմբերի 10-ին Մինսկում Հայաստանը ստորագրեց ԵՏՄ-ին անդամակցելու պայմանագիրը:
