Չարբախի ոստիկանապետի նախկին տեղակալ, «Դոգ» մականունով հայտնի Վարդան Ղուկասյանին մեղադրանք կառաջադրվի ՔՕ-ի 182-րդ հոդվածի հատկանիշներով (շորթում) եւ նա կկալանավորվի: Այս մասին հայտնեցին NEWS.am-ի աղբյուրները: Չի բացառվում, որ այս գործի շրջանակներում այլ ձերբակալություններ եւս լինեն:
Իսկ թե ինչ շորթման մասին է խոսքը եւ ինչու է նա ձերբակալվել, NEWS.am-ի աղբյուրները հայտնեցին, որ Չարբախի ոստիկանապետի տեղակալ աշխատելու տարիներին Վարդան Ղուկասյանը մարմնավաճառների ծառայություններ առաջարկող հյուրատներին շանտաժի է ենթարկել՝ ասելով, թե ձեր գործունեության վերաբերյալ համապատասխան տեսանյութեր կտեղադրի համացանցում: Եւ դա չանելու համար նա պահանջել է 1 մլն դրամ գումար, ինչն էլ հյուրատների ղեկավարները ստիպված են եղել տալ: Նմանատիպ շանտաժներով նա դիմել է տարբեր մարդկանց, ընդհուպ իր կոլեգաներին՝ ոստիկանության համակարգի աշխատակիցներին:
Ավելի վաղ NEWS.am-ը հայտնել էր, որ Երեւանում հոկտեմբերի 21-ին, ձերբակալվել է Չարբախի ոստիկանապետի նախկին տեղակալ, «Դոգ» մականունով հայտնի Վարդան Ղուկասյանը: Մեր տեղեկություններով՝ նրան ոստիկանությունից հեռացնելը կապված էր մի շարք աղմկահարույց պատմությունների հետ: Ավելին, նրա գործունեության վերաբերյալ հարուցված է քրեական գործ ՔՕ-ի 182-րդ հոդվածի հատկանիշներով (շորթում):
Հիշեցնենք, որ Վարդան Ղուկասյանը աշխատանքից հեռացվել էր Հյուսիսային պողոտայում «Հետք» էլեկտրոնային պարբերականի լրագրող Անի Հովհաննիսյանի հետ ունեցած միջադեպի պատճառով: Դոգը հրել եւ վիրավորել էր լրագրողին, որից հետո մեծ աղմուկ էր բարձրացել: Այնուհետեւ նա նշանակվել էր Երեւան քաղաքի վարչության Շենգավիթի բաժնի Չարբախի բաժանմունքի պետի տեղակալ: Ոստիկանապետ Վլադիմիր Գասպարյանի հրամանով՝ Վարդան Ղուկասյանն ազատվել է զբաղեցրած պաշտոնից եւ ոստիկանությունից: