Հայաստանը Արեւելյան գործընկերության ծրագրի գործընկեր է, ընդ որում՝ բավականին ուժեղ գործընկեր: Այդ մասին այսօր՝ հոկտմբերի 22-ին, մամուլի ասուլիսի ժամանակ հայտարարեց իր դիվանագիտական առաքելությունն ավարտող Հայաստանում Ֆրանսիայի արտակարգ եւ լիազոր դեսպան Անրի Ռենոն:
Ի պատասխան ԵՏՄ-ին Հայաստանի միանալու համատեքստում համագործակցության վերաբերյալ հարցին՝ դեսպանը նշեց հետագայում եւս ԵՄ-ի հետ համագործակցությունը խորացնելու հայկական կողմից հնչեցված մտադրությունը: Այդ ցանկությունն արտացոլվել է Վիլնյուսի գագաթնաժողովի ընթացքում ընդունված հայտարարության մեջ, այնտեղ հստակ նշված են ապագա համագործակցության ոլորտները, հիշեցրեց դիվանագետը: Անրի Ռենոյի խոսքով՝ ինչ վերաբերում է Ֆրանսիային, ապա այդ հարցով Հանրապետության նախագահը Երեւան կատարած իր այցի շրջանակներում հստակ հայտարարել է Հայաստանի հետ համագործակցությունը խորացնելու անհրաժեշտության մասին՝ չմոռանալով առաջնահերթությունները, որոնցից ելնելով, Հայաստանն ընդունել է ԵՏՄ-ին միանալու որոշում: «Կարծում եմ, որ սա շատ ուղիղ եւ կարեւոր հայտարարություն է՝ զերծ երկիմաստությունից», - փաստեց դեսպանը: Նրա խոսքով՝ ԵՄ-ն Հայաստանի հետ ցանկանում է սերտ կապեր պահպանել. «Կարծում է Հայաստանի ապագան խոստումնալից է»:
Ինչ վերաբերում է ԵՏՄ-ին Հայաստանի անդամակցության համատեքստում ՀՀ-ի եւ Ֆրանսիայի համագործակցությանը, ապա դեսպանը լավատեսորեն նշեց, որ ինչպես հայտարարել է Հայաստանի նախագահը, դա կընդլայնի հայկական շուկան եւ ֆրանսիացի գործարարները խորհում են այդ ուղղությամբ աշխատանքների վերաբերյալ:
