Հուլիսին Լեռնային Ղարաբաղի Հանրապետության տարածք ներթափանցած եւ ազատագրված Քարվաճառի շրջանում 17-ամյա Սմբատ Ցականյանին դաժանաբար սպանած ադրբեջանցիները դիվերսանտներ չեն, այլ միջազգային ահաբեկիչներ: NEWS.am-ի թղթակցի հետ զրույցում նման կարծիք հայտնեց Ազգային ժողովի «Ժառանգություն» խմբակցության պատգամավոր, ծնունդով արցախցի Թեւան Պողոսյանը:
«Պետք է ճիշտ գնահատել իրավիճակն ու ճիշտ անուններ տալ: Ինչո՞վ են այդ ադրբեջանցիները տարբերվում իսլամիստական տեռորիստներից: Մտել են մեր տարածք, գերեզմանոցի վրա սպանել, մորթել, գլխատել 17-ամյա տղային: Թե բացի դրանից ինչ մտադրություն են ունեցել, չենք կարող ասել, միգուցե ցանկացել են ջուրը թունավորել: Ամեն դեպքում նրանք դիվերսանտներ չեն եղել, այլ տեռորիստներ, որոնց պետք է պատժել միջազգային օրենքներով»,- ասաց Թեւան Պողոսյանը:
Ընդդիմադիր պատգամավորը կարծում է, որ ադրբեջանջիներին դատելիս՝ Հայաստանը որեւէ կերպ չպետք է միջամտի, ամեն ինչ պետք է արվի ԼՂՀ օրենքներով:
Նշենք, որ ադրբեջանցի դիվերսանտների գործով առաջին դատական նիստը կկայանա հոկտեմբերի 27-ին Ստեփանակերտում: Սմբատ Ցականյանի հարազատները NEWS.am-ի հետ զրույցում սակայն ասել էին, որ չեն ցանկանում՝ ադրբեջանցիներին դատեն:
«Մնք մեր ձեռքով պիտի սպանենք էդ արդբեջանցիներին, տանենք մեր գերեզմանոցների վրա սպանենք, ոնց որ իմ բալին սպանեցին, մենակ էդպես մեր սիրտը կհանգստանա, որպես ի՞նչ են նստացնում»,- ասել էր 17-ամյա տղայի մայրը՝ տիկին Կարինեն:
Հիշեցնենք, որ հուլիսի 10-ին լուրեր էին տարածվել, որ ադրբեջանցի դիվերսանտները Քարվաճառի 16-ամյա մի բնակչի են գերեվարել, որին մի քանի օր շարունակ հարազատները գտնել չէին կարողանում: Հուլիսի 15-ին տղայի դին հայտնաբերել են, իսկ մեկ օր անց էլ հուղարկավորել նրան փակ դագաղով, հարազատներին թույլ չեն տվել նույնիսկ դիակը տեսնել: Նշենք, որ այս գործով 2 մեղադրյալ կա: Դիլհամ Ասկերովին եւ Շահբազ Գուլիեւին մեղադրանք են առաջադրվել ԼՂՀ Քրեական օրենսգրքի 129-րդ հոդվածի 3-րդ մասի 1-ին կետով` մարդուն բացահայտ առեւանգելը, կյանքի համար վտանգավոր բռնություն գործադրելով, զենքի գործադրմամբ, անչափահասի նկատմամբ կատարված` կազմակերպված խմբի կողմից, Քրեական օրենսգրքի 103-րդ հոդվածի 2-րդ մասի 3-րդ, 7-րդ եւ 14-րդ կետերով` սպանությունը`զուգորդված մարդուն առեւանգելով, կազմակերպված խմբի կողմից, ազգային ատելությանշարժառիթով եւ ԼՂՀ քրեական օրենսգրքի 33-րդ հոդվածով, 103-րդ հոդվածի 2-րդ մասի 1-ին, 7-րդ եւ14-րդ կետերով` կազմակերպված խմբի կողմից ազգային ատելության շարժառիթով երկու անձանց սպանության փորձ:
