2013թ. հունիսի 1-ի գիշերը Սյունիքի մարզպետ Սուրիկ Խաչատրյանի (Լիսկա) տան մոտ տեղի ունեցած միջադեպի մասին Սյունիքի մարզի ընդհանուր իրավասության դատարանում առաջին անգամ պատմած Լորետա Բարսեղյանի խոսքերին պետք է վերապահումով մոտենալ. այս գործում կա մեկ օբյեկտիվ ապացույց՝ ձայնագրությունները: Այս մասին NEWS.am-ին ասաց գործով մեղադրյալ Արտակ Բուդաղյանի փաստաբան Հայկ Ալումյանը՝ մեկնաբանելով Լիսկայի կնոջ տված վկայությունը:
«Լորետա Բարսեղյանը խոսում է սպառնալիքներից, որովհետեւ նրա որդու՝ Տիգրան Խաչատրյանի ճակատագիրը կախված է նրանից, թե արդյոք Բուդաղյանները իրական վտանգ են ներկայացրել Սուրիկ Խաչատրյանի ընտանիքի համար, թե ոչ: Լորետա Բարսեղյանը ստիպված էր սպառնալիքներից խոսել: Այնպես որ նրա ցուցմունքներին պետք է վերապահումով մոտենալ, Լորետան ուրիշ ելք չունի, նրանք փորձում են ամեն կերպ ապացուցել, որ Արտակ եւ Ավետիք Բուդաղյանները սպառնացել են իրենց: Մինչդեռ ձայնագրություններում նման բան չկա»,- ասաց փաստաբանը:
Հայկ Ալումյանը նշեց նաեւ, որ Լորետա Բարսեղյանը դատական նիստին իր տված հարցերի մեծ մասին հրաժարվել է պատասխանել՝ մոտ 30-40 րոպե մտածելուց հետո:
«Հաջորդ դատական նիստին կշարունակվի Լորետա Բարսեղյանի հարցաքննությունը, որից հետո կհարցքաննվեն Նիկոլայ Աբրահամյանն ու Տիգրան Խաչատրյանը»,- ավելացրեց փաստաբանը:
Նշենք, որ դատարանում Սուրիկ Խաչատրյանի կինը պատմել էր, որ դեպքի օրը Ավետիք և Արտակ Բուդաղյանները եկել են իրենց տան մոտ, Արտակը հայհոյանքներ ու սպառնալիքներ է հնչեցրել Սուրիկ Խաչատրյանի ընտանիքի հասցեին:
Հիշեցնենք, որ Արտակ Բուդաղյանին մեղադրանք է առաջադրվել այն բանի համար, որ նա, նախորդ տարվա հունիսի 1-ին տեղեկանալով, որ իր եղբայրը՝ Գորիսի քաղաքապետի նախկին թեկնածու Ավետիք Բուդաղյանը, Սյունիքի նախկին մարզպետ Սուրիկ Խաչատրյանի ավտոմեքենայում ծեծի է ենթարկվել, Սուրիկ Խաչատրյանին և նրա ընտանիքի անդամներին վախեցնելու նպատակով գնացել է Սուրիկ Խաչատրյանին պատկանող առանձնատան մոտ, իր անվամբ գրանցված որսորդական հրացանը ձեռքին իջնելով ավտոմեքենայից՝ սպանության սպառնալիքներ է տվել Սուրեն Խաչատրյանի ընտանիքի անդամներին: Ավետիք Բուդաղյանը սպանվել է, իսկ Արտակ Բուդաղյանը՝ հրազենային վնասվածքներով տեղափոխվել հիվանդանոց: