Երեւանի Հերացու անվան պետական բժշկական համալսարանի նախկին ռեկտոր Վիլեն Հակոբյանը տեղյակ էլ չի եղել, որ իր դռան դիմաց նռնակ է եղել: Այս մասին NEWS.am-ի թղթակցի հետ զրույցում ասաց Վիլեն Հակոբյանը:
Նա նշեց, որ նռնակը նկատել է հարեւանը, զանգել է իրեն, բայց իրենք հեռախոսին չեն պատասխանել, այդ պատճառով էլ դիմել է ԱԻՆ: Նախկին ռեկտորն ասաց, որ նռնակը տեղադրված էր իր հարեւանի դռանը, որտեղ 10 տարուց ավել է՝ մարդ չի ապրում:
«Չեմ կարծում, թե ուզել են ինձ սպանել, ես ամեն օր 6.30 տնից դուրս եմ գալիս, կարող էին այդ ժամանակ ինչ-որ բան անել: Եւ հետո, Փառք Աստծո, որեւէ թշնամի չունեմ, կյանքում փորձել եմ որեւէ մեկին անձնական վնաս չտալ: Սա կամ պատահականություն է, կամ երեխաների խաղի հետեւանք: Ես չեմ էլ տեսել՝ ինչ տեսակի ռումբ է, ասել են մի քանի օրից կասեն: Դեպքի մասին էլ ուշ եմ իմացել, մեկ էլ աղմուկ լսեցի, մոտեցա դռանը, ասացին՝ դռնից հեռու մնացեք»,-ասաց Վիլեն Հակոբյանը:
Ավելի վաղ NEWS.am-ը հայտնել էր, որ հոկտեմբերի 21-ին, ժամը 22.30-ին, ոստիկանության Երեւան քաղաքի վարչության օպերատիվ կառավարման կենտրոնից Արաբկիրի բաժնում հաղորդում է ստացվել, որ իրենց է զանգահարել Երեւանի Օրբելի Եղբայրների փողոցի 33 շենքի բնակիչներից մեկը եւ հայտնել, որ շենքի թիվ 28 բնակարանի պատշգամբի դռան բռնակից կոշիկ է կախված, որի մեջ նռնականման առարկա է նկատել:
Ոստիկանության մամուլի ծառայությունից հայտնում են, որ մեկնած օպերատիվ խումբը 76-ամյա Վիլեն Հ.-ի բնակարանի չօգտագործվող մուտքի դռան բռնակից կախված սպորտային կոշիկի միջից հայտնաբերել է «Ֆ-1» տիպի նռնակ եւ պայթուցիչ, որը սակրավորի կողմից վնասազերծվել է:
Հայտնաբերվածն առգրավվել եւ ուղարկվել է փորձաքննության:
Կատարվում է նախաքննություն:
