«Վերնիսաժում» մայիսի 17-ին հնչած կրակոցների գործով կալանավորված Վալերի Հովհաննիսյանի փաստաբան Արայիկ Ալվանդյանը, ծանոթանալով գործի նյութերին, պնդում է, որ իր պաշտպանյալի գործողություններում հանցակազմ չկա: NEWS.am-ի թղթակցի հետ զրույցում Արայիկ Ալվանդյանը հայտնեց, որ ինքն այդ կապակցությամբ միջնորդություններ է ներկայացրել:
«Իմ միջնորդությունները մերժվեցին, սակայն պնդում եմ, որ Վալերին այս գործով տուժող է, ոչ թե մեղադրյալ, նրա հանցանքն ապացուցված չէ: Ցուցմունքներում էլ ոչինչ չկա այն մասին, որ Վալերի Հովհաննիսյանը խուլիգանություն է կատարել, միայն մի վկա ասել է, որ հայհոյանքներ է լսել, սակայն խուլիգանության մասին խոսք չկա»,- ասաց փաստաբանը:
Ինչ վերաբերվում է գործով մեկ այլ մեղադրյալ, Վալերի Հովհաննիսյանին եւ 4 անձի հրազենային վնասվածք հասցրած Գոռ Առաքելյանի փաստաբան Երեմ Սարգսյանի պնդումներին, թե Վալերի Հովհաննիսյանը ծեծի է ենթարկել իր պաշտպանյալին, Արայիկ Ալվանդյանը պատասխանեց. «Վալերի Հովհաննիսյանը ի սկզբանե հայտնել է, որ կապ չունի կատարվածի հետ, թե ով ինչ է արել, ես չգիտեմ: Գործով առաջին դատական նիստը կնշանակվի մինչեւ նոյեմբերի 20-ը, ամեն ինչ կբացահայտվի»:
Անդրադառնալով Վալերի Հովհաննիսյանի առողջական վիճակին, փաստաբանը նշեց, որ իր պաշտպանյալին շուտով կտեղափոխեն քաղաքացիական հիվանդանոց՝ վիրահատություն կատարելու: Նշենք, որ Վալերի Հովհաննիսյանին կալանավորել են՝ աղիքը դուրս ընկած վիճակում, առ այսօր նա գտնվում է «Նուբարաշեն» ՔԿՀ-ի բուժմասում:
Հիշեցնենք, որ ըստ նախնական վարկածի՝ Ներսես Մելքոնյանն ու նրա ընկեր Վալերի Հովհաննիսյանը մայիսի 17-ին՝ ժամը 13:30-ի սահմանում, «Վերնիսաժի» մոտ վեճի են բռնվել Գոռ Առաքելյանի հետ եւ բռնություն կիրառել նրա նկատմամբ, հնչել են կրակոցներ, 5 մարդ վիրավորվել էր, այդ թվում՝ Ներսես Մելքոնյանն ու նրա ընկեր Վալերի Հովհաննիսյանը, նաեւ պատահական անցորդներ: ԱԺ ԲՀԿ-ական պատգամավոր Կարո Կարապետյանի փեսան՝ Գոռ Առաքելյանը, մայիսի 18-ին ինքնակամ ներկայացել էր ոստիկանություն: Նրա դեմ մեղադրանք է առաջադրվել սպանության փորձ կատարելու, ինչպես նաեւ երկու եւ ավել անձանց առողջությանը ծանր, մեկ անձի՝ միջին ծանրության վնաս պատճառելու համար, իսկ խափանման միջոց է ընտրվել կալանավորումը։ Հունիսի 9-ին կալանավորվել էր նաեւ Ներսես Մելքոնյանը, նրան մեղադրանք է առաջադրվել խուլիգանություն կատարելու համար: Նույն մեղադրանքով կալանավորվել է նաեւ Վալերի Հովհաննիսյանը։ Գործով նախաքննությունն ավարտվել է: