Total նավթային ընկերության ղեկավարի ինքնաթիռի կործանման պատճառով Վնուկովո օդանավակայանի գլխավոր տնօրեն Անդրեյ Դյակովը եւ նրա տեղակալ Սերգեյ Սոլնցեւը հրաժարական են տվել: Այդ մասին գրում է «Ռոսբալտը»՝ վկայակոչելով օդանավակայանի մամուլի ծառայությանը:
Միաժամանակ, աշխատանքից ազատվել են օդանավակայանի հերթափոխի տնօրենը, օդակայանի շահագործման ստորաբաժանման պետը, հերթափոխի առաջատար ինժեներ-ղեկավարը:
«Օդանավակայանն, իր հերթին, ամեն ինչ անում է, որպեսզի ավիավթարի հետաքննությունն իրականացվի արագ եւ օբյեկտիվ. տրամադրում է բոլոր անհրաժեշտ տեղեկությունները եւ ապահովում պատահարի հետաքննությամբ զբաղվող գերատեսչությունների ու ծառայությունների աշխատակիցների անարգել մուտքը ողբերգության վայր», - աղբյուրը մեջբերում է մամուլի ծառայության հաղորդագրությունը:
