Ֆրանսիա-Ղարաբաղ բարեկամության շրջանակը ողջունել է Եվրախորհրդարանում Լեռնային Ղարաբաղի հետ բարեկամության խմբի ստեղծումը:
Բրյուսելում ԼՂՀ անկախության 23-րդ տարեդարձին նվիրված հանդիսավոր միջոցառումը համախմբել էր Եվրախորհրդարանի մեկ տասնյակից ավելի պատգամավորների, Բրյուսելում տեղակայված միջազգային եւ համայնքային նշանակության մի շարք կառույցների պատասխանատուների։
Միջոցառմանը, որի գլխավոր բանախոսը Արցախի Ազգային ժողովի նախագահ Աշոտ Ղուլյանն էր, ելույթ է ունեցել նաև Եվրախորհրդարանի լյուքսեմբուրգցի պատգամավոր Ֆրանկ Էնգելը: Վերջինս, ողջունելով ԼՂՀ անկախության հերթական տարեդարձը՝ հայտարարել է Եվրախորհրդարանում Արցախի հետ բարեկամության խմբի ձևավորման մասին։
«Սա ճիշտ ուղղությամբ արված կարևոր քայլ է. եվրոպական հաստատություններում Լեռնային Ղարաբաղին առավել մեծ ներկայությանը նպաստելը նշանակում է նպաստել այդ հաստատությունների կողմից այս երկրի իրականությունը առավել հիմնավոր կերպով ճանաչելուն» - մեկնաբանել է Ֆրանսիա-Ղարաբաղ բարեկամության շրջանակի նախագահ Ֆրանսուա Ռոշբլուանը :
Անդրազգային այս խմբի նպատակը ճանաչողական այցերի միջոցով եվրոպական և ղարաբաղյան քաղաքացիական հասարակությունների միջև հարաբերությունների հաստատմանը նպաստելն է, ինչպես նաև եվրոպական և միջազգային հաստատություններում Լեռնային Ղարաբաղի ներկայությունն ամրապնդելը :
«Մեր ժամանակաշրջանում այլևս անհնար և ապօրինի են որևէ երկրի՝ արտաքին աշխարհի հետ հաղորդակցությունը խանգարելու փորձերը»,- նշել է Ֆրանսուա Ռոշբլուանը: «Եվրոպան պետք է սովորի ճանաչել Լեռնային Ղարաբաղը: Ծանոթանալով երկրին` Բրյուսելն այն կճանաչի»,- եզրափակել է նա: