Հայաստանում հղիության եւ հիվանդության նպաստերը չպետք է փոշիացվեն, հոկտեմբերի 23-ին լրագրողներին ասել է ՀՀ աշխատանքի եւ սոցիալական հարցերով նախարար Արտեմ Ասատրյանը:
Նա նշել է, որ եթե 2014թ. հղիության եւ հիվանդության նպաստների համար նախատեսվել էր հատկացնել 4,5 մլրդ դրամ, ապա տարին փակվելու է 12 մլրդ դրամով (շուրջ 29 մլն դոլար): Այս աճը պատճառաբանված չէ, քանի որ Հայաստանում ծնելիությունը տարեցտարի 42 – 43 հազար երեխա մակարդակի վրա է եւ 2014 թ. կտրուկ չի ավելացել: «Եթե վճարելու հարկ լիներ ծնելիություն աճի պատճառով, մենք միայն ուրախ կլինեինք: Սակայն թվերը դա չեն հաստատում», - նշել է Ասատրյանը:
Ըստ նրա՝ անբացատրելի է նաեւ հիվանդության պատճառով բացակայելու ժամկետի միջին աճը: Եթե նախկինում այն կազմում էր 7 օր, ապա այժմ՝ 14: Նշենք, որ ի տարբերություն խորհրդային տարիների, միայն 5-րդ օրվանից սկսած է պետությունը վճարում հիվանդության նպաստը:
Նախարարը հավելել է, որ ըստ էության, չեն բացառվում այն տարբերակները, երբ գործատուն հղի կին է ձեւակերպում, որը կարճ ժամանակ անց դեկրետ է գնում եւ սկսում նպաստ ստանալ: «Մենք ուսումնասիրել ենք մյուս պետությունների փորձը եւ եզրակացրել, որ մեծամասամբ նպաստների իրավունքը սահմանափակ է. այն չի կարելի ստանալ՝ չունենալով որոշակի աշխատանքային փորձ», - հավելել է Արտեմ Ասատրյանը: Նա միաժամանակ պարզաբանել է, որ կառավարությունը մի շարք առաջարկներ է մշակել, սակայն դրանք վերջնական բնույթ չեն կրում եւ պարտադիր կքննարկվեն հասարակության լայն շրջանակների հետ: