Ազգային ժողովի ՀՀԿ խմբակցության պատգամավոր Արտակ Դավթյանը կարծում է, որ խորհրդարանական ոչ իշխանական եռյակը` ԲՀԿ-ն, ՀԱԿ-ն ու «Ժառանգությունը», Սահմանադրական բարեփոխումների մասին կարծիք է հայտնում` առանց ծանոթանալու հայեցակարգին:
«Դաշնակցությունը գաղափարի վրա հիմնված կուսակցություն է, մնացածն առանց ծանոթանալու, կարդալու, շուտասելուկի նման կրկնում են, թե իշխանության վերարտադրման համար է արվում այս ամեն ինչը: Նրանք խոսում են` առանց հիմնավորման, չեն ասում, թե ինչին են դեմ, ինչ պատճառով: Այս հայեցակարգում առավել կարեւոր հարցեր կան, քան խորհրդարանական կառավարման համակարգին անցնելուն»,- այս մասին այսօր` հոկտեմբերի 23-ին, լրագրողների հետ զրույցում ասաց ՀՀԿ-ական պատգամավորը` պատասխանելով հարցին, թե արդյոք Սահմանադրական բարեփոխումներն արվում են իշխանության վերարտադրման համար, թե ոչ:
Նշենք, որ Սահմանադրական բարեփոխումներին ընդդիմադիր քաղաքական ուժերից կողմ է միայն ՀՅԴ-ն: ԲՀԿ-ն, ՀԱԿ-ն ու «Ժառանգությունը» դեմ են բարեփոխումներին եւ իրենց հանրահավաքներում հենց անդրադառնում են այդ թեմային` ընդգծելով, որ այս բարեփոխումներով իշխանությունները ցանկանում են վերարտադրվել: