Հայաստանի ներքաղաքական իրավիճակն ինչքան կայուն եղել է, այդպես էլ կշարունակվի հոկտեմբերի 24-ից հետո: Այսօր` հոկտեմբերի 23-ին, լրագրողների հետ զրույցում այսպիսի կարծիք հայտնեց Ազգային ժողովի ՀՀԿ խմբակցության պատգամավոր Արտակ Դավթյանը` անդրադառնալով խորհրդարանական ոչ իշխանական եռյակի` ԲՀԿ-ի, ՀԱԿ-ի եւ «Ժառանգության» առաջիկա համատեղ հանրահավաքին:
«Հոկտեմբերի 24-ից հետո կգա հոկտեմբերի 25-ը: Չեմ կարծում, որ ընդդիմությունը կանցնի սահմանը, իսկ սահմանն օրենքով գծվածն է: Իրենք արտահայտություններ են անում` տաք աշուն, թեժ աշուն, այս ամեն ինչը լինելու է գործող օրենքի շրջանակներում: Հոկտեմբերի 24-ին էլ ոստիկանությունն ու հանրահավաքի կազմակերպիչները լինելու են իրենց բարձրության վրա»,- ասաց ՀՀԿ-ական պատգամավորը:
Նշենք, որ ոչ իշխանական եռյակի հանրահավաքը տեղի կունենա հոկտեմբերի 24-ին Ազատության հրապարակում:
