Ճապոնական ավտոարտադրող Nissan-ը Takata ընկերության կողմից արտադրված անվտանգության բարձիկների թերության պատճառով հայտարարել է ամբողջ աշխարհից 260 հազար ավտոմեքենաների հետ կանչի մասին, գրում է «ՌԻԱ Նովոստին»:
Աղբյուրի փոխանցմամբ՝ հետկանչման են ենթակա 2008-2012թ. ժամանակահատվածում արտադրված Micra եւ Cube մոդելները: Ընդհանուր առմամբ, Ճապոնիայից 105 հազար, Եվրոպայից 30 հազար եւ Չինաստանից 11 հազար ավտոմեքենա հետ կկանչվի: Ավտոմեքենաների անվտանգության բարձիկները կարող են պայթել, ինչի արդյունքում սրահում հնարավոր է մետաղական մասնիկներ հայտնվեն, որոնք ընդունակ են վնասելու ուղեւորներին եւ վարորդին:
Աղբյուրը հիշեցնում է, որ ԱՄՆ-ի Ճանապարհային երեւեկության անվտանգության ազգային վարչությունը 7,8 մլն ավտոմեքենաների վարորդներին կոչ է արել փոխել անվտանգության բարձիկները: Այդ ավտոմեքենաներում նույնպես Takata ընկերության անվտանգության բարձիկներ են տեղադրվել: Միջադեպից հետո ընկերության բաժնետոմսերը 22%-ով ընկել են:
