Ընթացիկ տարվա ինն ամիսներին ՀՀ ոստիկանությունը Ինտերպոլի անդամ երկրներում ձեռնարկված միջոցառումների արդյունքում կարողացել է պարզել երկրի իշխանությունների կողմից հետախուզվող 95 անձի գտնվելու վայրը: Այս մասին հոկտեմբերի 23-ի մամուլի ասուլիսում հայտարարել է Հայաստանում Ինտերպոլի ազգային կենտրոնական բյուրոյի պետ, ոստիկանության փոխգնդապետ Արա Ֆիդանյանը՝ հավելելով, որ նրանցից 66-ին ձերբակալել են, 13-ին՝ արտահանձնել:
Ըստ փոխգնդապետի՝ ՀՀ իրավապահ մարմինները նշված ժամանակահատվածում 89 նոր հարցում են ստացել հետախուզվող անձանց վերաբերյալ: «Ընդհանուր առմամբ միջազգային հետախուզման մեջ է 309 մարդ», - նշել է Ֆիդանյանը: Միեւնույն ժամանակ, հավելել է նա, Ազգային կենտրոնական բյուրոն արդյունավետ միջոցառումներ է անցկացնում Ինտերպոլի անդամ երկրների կողմից հետախուզում հայտարարված մարդկանց հայտնաբերելու ուղղությամբ:
Նշված ժամանակահատվածում, ըստ Արա Ֆիդանյանի, Ինտերպոլի անդամ երկրներից ստացվել է 105 նոր հարցում: «ՀՀ Ոստիկանության ստորաբաժանումների կողմից իրականացված գործողությունների շնորհիվ մեր երկրում հայտնաբերվել է հետախուզման մեջ գտնվող 53 մարդ (2013 թ. այդ թիվը կազմել էր 33): Նրանցից 28-ը ձերբակալվել են, 8-ը՝ արտահանձնվել: Հարցումներ են ստացվել նաեւ 8 չճանաչված դիակների կապակցությամբ, որոնցից 2-ի ինքնությունը պարզվել է», - ընդգծել է Հայաստանում Ինտերպոլի Ազգային կենտրոնական բյուրոյի պետը: