«Բոքո հարամ» ծայրահեղական խմբավորման անդամները Նիգերիայի Ադամավա նահանգում 60 կին եւ աղջիկ են առեւանգել, հայտնում է ՏԱՍՍ-ը՝ վկայակոչելով Նիգերիայի լրատվամիջոցները:
Ըստ աղբյուրի՝ հարյուրավոր զինված գրոհայիններ հարձակվել են Վագա Մանգորոյի եւ Գարտա բնակավայրերի վրա: «Նրանք այրել են բնակիչների տները, առեւանգել կանանց եւ դեռատի աղջիկների», - ասվում է հաղորդագրությունում:
Աղբյուրը նշում է, որ Բորնո եւ Յոբե նահանգներում 2013թ. մայիսից գործում է արտակարգ դրության ռեժիմ, որն իշխանությունները մտցրել են գրոհայինների դեմ պայքարի համար: Խաղաղ բնակիչները շարունակում են արագ լքել ծայրահեղականների վերահսկողության տակ հայտնված թաղամասերը:
Վերջին 5 տարիներին ահաբեկչության զոհ է դարձել շուրջ 10 հազար մարդ: Մարտական գործողությունների հետեւանքով իր տունը լքել է շուրջ 700 հազար մարդ: