Պաշտպանության նախարարության Վարդենիսի զինվորական հոսպիտալից երկկողմանի թոքաբորբ ախտորոշմամբ, մարմնական վնասվածքներով ՀՀ ՊՆ կենտրոնական կլինիկական զինվորական հոսպիտալ հունվարի 13-ին տեղափոխված N զորամասի ժամկետային զինծառայող, նորակոչիկ Մհեր Արմենի Խլղաթյանին ծեծի են ենթարկել հունվարի 11-ին:
NEWS.am-ը Դատական տեղեկատվական համակարգից տեղեկացավ, որ Արման Թադեւոսյանը, Իշխան Կիրակոսյանը, Հրաչ Մնացականյանն եւ Վահե Օհանյանը մեղադրվում են այն բանի համար, որ նրանք, զինվորական ծառայության մեջ գտնվելով, զորամասում տարբեր պաշտոններ զբաղեցնելով, հանդիսանալով պետ եւ պաշտոնատար անձ, զիվորական համազգեստը չհագնելու կապակցությամբ, սեռական բնույթի հայհոյանքներ են տվել նորակոչիկ Մհեր Խլղաթյանին: Բացի դրանից՝ նրանք դիտավորությամբ ծեծի են ենթարկել զինծառայող Մհերին՝ պատճառելով միջին ծանրության վնաս`առողջության տեւական քայքայումով:
Բուժծառայության պետ, կապիտան Արման Թադեւոսյանին, ժամկետային զինծառայող, կրտսեր սերժանտ Վահե Օհանյանին եւ դասակի հրամանատար, ավագ լեյտենանտ Հրաչ Մնացականյանին եւ Իշխան Կիրակոսյանին մեղադրանք է առաջադրվել Քրեական օրենսգրքի 358.1 հոդվածի 3-րդ մասի 1-ին եւ 4-րդ կետերով (մի խումբ անձանց կողմից զինվորական ծառայության պարտականությունները կատարելու կապակցությամբ ստորադասին նկատմամբ բռնություն գործադրելը` առողջությանը թեթեւ կամ միջին ծանրության վնաս պատճառելով):
Վահե Օհանյանին մեղադրանք է առաջադրվել Քրեական օրենսգրքի 358.1 հոդվածի 2-րդ մասով, այն է՝ զինվորական ծառայության պարտականությունները կատարելու կապակցությամբ ստորադասին (ենթակային) ծեծելը կամ նրա նկատմամբ այլ բռնություն գործադրելը կամ դա գործադրելու սպառնալիքը ստորադասի (ենթակայի) կամ նրա մերձավորի նկատմամբ: 4 զինծառայողներն էլ կալանավորված են:
Գործը քննվում է Գեղարքունիքի մարզի ընդհանուր իրավասության դատարանի Վարդենիսի նստավայրում:
Դատական հաջորդ նիստը նշանակված է նոյեմբերի 5-ին:
Հիշեցնենք, որ 2014թ. հունվարի 13-ին, ժամը 02-10-ի սահմաններում ՀՀ ՊՆ Վարդենիսի զինհոսպիտալից երկկողմանի թոքաբորբ ախտորոշմամբ, մարմնական վնասվածքներով ՀՀ ՊՆ կենտրոնական կլինիկական զինվորական հոսպիտալ էր տեղափոխվել N զորամասի ժամկետային զինծառայող, նորակոչիկ Մհեր Արմենի Խլղաթյանը: