Հայաստանի Ճանապարհային ոստիկանությունն արձագանքել է «Բարեւ Երեւան» խմբակցության անդամ Անահիտ Բախշյանի՝ Երեւանի քաղաքապետին ուղղված գրությանը: Բախշյանը հարց էր բարձրացրել, որ Շահումյանի հրապարակից դեպի Հանրապետության հրապարակ ուղղությամբ` Վ. Սարգսյան փողոցով երթեւեկելիս ձախ թեւի վրա եւ Տիգրան Մեծի փողոցի վրա գտնվող «Լավանդա» խանութի դիմաց տեղադրված 3.27 «ԿԱՆԳԱՌՆ ԱՐԳԵԼՎՈՒՄ Է» եւ 6.4 «ԿԱՅԱՆՄԱՆ ՏԵՂ» ճանապարհային նշանները հակասում են միմյանց եւ վարորդների տուգանման պատճառ դառնում:

Այս առնչությամբ ոստիկանության պարզաբանման մեջ նշվում է.

«Միանգամից նշենք, որ տեղադրված նշաններն իրար չեն հակասում: ՀՀ կառավարության 26.10.2006 թ. «Ճանապարհային լուսացույցերին ներկայացվող պահանջները, դրանց կիրառման ու տեղակայման կանոնները հաստատելու մասին» որոշման հավելված № 3-ի 50.35 եւ Հայաստանի Հանրապետությունում գործող ԳՕՍՏ Ռ 52289-2004 «Ճանապարհային երթեւեկության կազմակերպման տեխնիկական միջոցներ» ստանդարտի 5.4.31 կետերով 3.27 ճանապարհային նշանի ազդման գոտին կարող է սահմանափակվել 6.4 ճանապարհային նշանի եւ (կամ) 1.4 դեղին գույնի հորիզոնական հոծ գծանշման միջոցով: Վ. Սարգսյան փողոցում երկու պայմաններն էլ միաժամանակ ապահովված են:

3.27 նշանը Վ. Սարգսյան փողոցում ընդհանրապես կարելի էր չտեղադրել, որովհետեւ Հայաստանի Հանրապետության ճանապարհային երթեւեկության կանոնների 84-րդ կետի 3-րդ եւ 4-րդ ենթակետերի համաձայն՝ տվյալ վայրերում կանգառն արգելվում է: Սակայն հաշվի առնելով մեր վարորդների նման նրբին հարցերի վերաբերյալ ոչ բավարար գիտելիքները` դրանք ստիպված տեղադրվել են»:

Վարորդները վճարում են կայանման համար եւ... տուգանվում