Երեւանի կրկեսի կոլեկտիվը վերադարձել է Արցախից, ուր հյուրախաղերի էր մեկնել եւ 10 օր շարունակ իր յուրօրինակ ելույթներով ուրախացրել հայրենիքի պաշտպաններին՝ ԼՂՀ Զինված ուժերի զինծառայողներին:
Հայաստանի կրկեսային գործիչների միությունից հայտնում են, որ սկսած 1999 թվականից, Երեւանի կրկեսի ստեղծագործական կոլեկտիվը յուրաքանչյուր տարի համերգային ելույթներ է կազմակերպում Արցախի տարբեր զորամասերում: Այս տարվա հյուրախաղերի ծրագրում երեք նոր համար էր ընդգրկված: Առաջնագծում ծառայող մեր զինվորականները մեծ հիացմունքով եւ բուռն ծափահարություններով ընդունեցին կրկեսի երիտասարդ արտիստ Համլետ Օհանյանին եւ նրա ցուցադրած գլխարկներով ձեռնածության համարը: Այն նույն համարը, որի կատարմամբ ժամանակին իր ասպարեզում փառքի ու մեծ ճանաչման արժանացավ այժմ Հայաստանի կրկեսային գործիչների միության նախագահ, Երեւանի կրկեսի ղեկավար Սոս Պետրոսյանը: Նաեւ այդ առումով պարտավորեցնող համարն անթերի կատարելու համար 17-ամյա Համլետը 6 տարի շարունակ հղկում ու կատարելագործում էր իր կատարողական տեխնիկան: Դատելով հանդիսատեսների հիացական արձագանքից, Համլետի առաջին ելույթը՝ Արա Գեւորգյանի «Արցախ» կոմպոզիցիայի երաժշտության ներքո, իսկապես անթերի ստացվեց: Ոչ պակաս հիացմունքով հանդիսատեսն ընդունեց մյուս երկու նոր համարները. Արսեն Կիրակոսյան եւ Արման Գաբրիելյան դուետի ցուցադրած գնդակներով կոմիկական ձեռնածությունը, ինչպես նաեւ Անի Գասպարյանի «Անտիպոդ» ակրոբատիկ համարը:
Այս անգամ կրկեսային ծրագրում եւս մեկ նորամուծություն էր տեղ գտել. դերասանները զինվորներին առաջարկեցին իրենց ինչ-որ հետաքրքիր համար ցուցադրել: Պարտադիր չէր՝ կրկեսային հնարքներ, կարելի էր նաեւ երգել, պարել կամ մարմնամարզական ակրոբատիկայի տարրեր ներկայացնել: Զինվորներն անարձագանք չթողեցին առաջարկությունը, իսկ հաղթողին որոշում էին հենց իրենք՝ զինծառայողները, ում ելույթն ամենից բարձր եւ բուռն ծափահարությունների արժանացավ, նա էլ հաղթող ճանաչվեց: Իսկ հաղթողի մրցանակն արտահերթ արձակուրդն էր, որի վերաբերյալ կրկեսային թատերախումբը գլխավորող, Ենգիբարովի անվան կրկեսային ստուդիայի գեղարվեստական ղեկավար Նաիրա Պետրոսյանը նախօրոք պայմանավորվել էր ԼՂՀ բարձրագույն զինվորական ղեկավարության հետ:
Երեւանի կրկեսը հյուրախաղային ծրագրով մտադիր է առաջիկայում մեկնել Լոռու մարզի քաղաքներ: