ԼՂՀ տեղական ինքնակառավարման մարմինների լիազորությունների իրականացման նկատմամբ իրավական հսկողություն եւ պետական վերահսկողություն իրականացնող պաշտոնյաների համար այսօր, կառավարության աշխատակազմի նախաձեռնությամբ, Ստեփանակերտում մեկնարկել է դասընթաց, որում ընդգրկված են մոտ 50 պատասխանատու աշխատակիցներ՝ հանրապետության բոլոր շրջվարչակազմերից:
ԼՂՀ կառավարության մամուլի ծառայությունից հայտնում են, որ դասընթացի մասնակիցներին ողջունել է վարչապետ Արայիկ Հարությունյանը՝ միջոցառումը համարելով համայնքապետերի համար կազմակերպված վերապատրաստման կուրսերի շարունակություն: Կառավարության ղեկավարն արդյունավետ աշխատանք է մաղթել ներկաներին եւ հույս հայտնել, որ այս կարճ ժամանակահատվածում ձեռքբերվելիք գիտելիքներն օգնելու են նրանց՝ տեղական մարմիններում կառավարումն ավելի արդյունավետ կազմակերպելու գործում, ինչը հանգեցնելու է Արցախում ժողովրդավարության սկզբունքների ամրապնդմանը:
Վարչապետը հորդորել է դասընթացի մասնակիցներին ամենօրյա աշխատանքում հաճախակի հանդիպող խնդիրները համարձակ կերպով վերհանել՝ միասին լուծումներ փնտրելու համար: Քննադատելով շրջվարչակազմերի աշխատակիցների՝ երբեմն հանդիպող մոտեցումները քաղաքացիներին ծառայելու ընթացքում՝ նա պահանջել է բարեխիղճ լինել աշխատանքում, համբերատար ու անմիջական՝ քաղաքացիների ընդունելության ժամանակ: Ա. Հարությունյանը համոզմունք է հայտնել, որ մասնակիցների կողմից նոր գիտելիքների ու փորձի ձեռքբերման եւ ամրապնդման արդյունքում շատ հարցեր կլուծվեն տեղերում, եւ քաղաքացիների մոտ կմեծանա վստահությունը տեղական ինքնակառավարման մարմինների նկատմամբ:
Մեկուկես օր տեւողությամբ դասընթացի ժամանակ շրջվարչակազմերի պատասխանատու աշխատակիցներին կներկայացվեն դասախոսություններ՝ ՏԻՄ-երի լիազորությունների նկատմամբ իրավական հսկողության, հողերի օգտագործման եւ պահպանման նկատմամբ վերահսկողության, գործավարության, տեղական եկամուտների հավաքագրման եւ ծախսման գործընթացի կատարելագործման եւ այլ թեմաներով:
