Հայաստանի իշխող Հանրապետական կուսակցությունը ինքն է իրականացնում իշխանափոխություն՝ առաջարկելով սահմանադրական բարեփոխումներ: Այդ մասին այսօր՝ հոկտեմբերի 24-ին, խորհրդարանում հայտարարեց Հանրապետական խմբակցության ղեկավար Վահրամ Բաղդասարյանը:
Նրա խոսքով՝ իշխող կուսակցությունը ինքն է առաջարկել իշխանափոխություն՝ դառնալով կառավարման նախագահական համակարգից խորհրդարանականին անցնելու նախաձեռնության հեղինակը: «Մենք առաջարկում ենք սահմանադրական բարեփոխումներ, կառավարման համակարգի փոփոխություն: Եթե խորհրդարանական եռյակը, խոսելով իշխանափոխության մասին, ենթադրում է անձերի փոփոխություն, սա արդեն ուրիշ հարց է: Այստեղը ձեւակերպումների խնդիր է: Առջեւում 2017 եւ 2018թթ. են (խորհրդարանական եւ նախագահական ընտրություններ՝ խմբ.), եւ եթե 2017թ. ընտրությունների արդյունքում այս կամ այն ուժը ձայների առավելագույն քանակություն հավաքի, ապա իշխանություն ձեռք կբերի, կամ կձեւավորվի կոալիցիա: Ժամանակը ցույց կտա», - ասաց Բաղդասարյանը:
Խմբակցության ղեկավարը նաեւ նշեց, որ մի քանի ամիս առաջ Հայաստանը պատերազմի շեմին էր, սակայն արտաքին սպառնալիքը հաղթահարվեց, իսկ այժմ իշխող կուսակցությունն առաջարկում է խորհրդարանական բարեփոխումներ: Քաղաքական գործիչը նաեւ հավելեց, որ խորհրդարանական եռյակի առաջնորդները ժամանակին եղել են իշխանությունում, եւ նրանց ամեն ինչ բավարարում էր. «Այս անգամ ի՞նչ պատահեց, որ նրանց չի բավարարում: Թող ծրագիր կազմեն, եւ մենք պատրաստ ենք այն քննարկել»: