Ադրբեջանական կողմն այժմ արդեն ղարաբաղյան հարցը սկսել է կապել Բաքու-Թբիլիսի-Կարս երկաթգծի հետ: Այդ մասին NEWS.am-ի թղթակցին հայտարարեց ջավախահայ, «Միասնական Ջավախք» քաղաքական շարժման առաջնորդ, Միխայիլ Սահակաշվիլիի կառավարման տարիներին նախկին քաղբանտարկյալ Վահագն Չախալյանը:
Նրա խոսքով՝ մինչ օրս նրանք հավաստիացում էին, որ այս երկաթուղին ուղղված չէ որեւէ երրորդ երկրի դեմ, այն չի կարող լինել ինչ-որ երրորդ երկրի վրա ճնշում գործադրելու միջոց, որ սա քաղաքական նախագիծ չէ, այլ բիզնես նախագիծ, որից կարող են օգտվել տարածաշրջանի բոլոր երկրները, որ այս նախագիծը նպաստելու է խաղաղության եւ կայունության ամրապնդմանը: «Նմանօրինակ բազմաթիվ հայտարարություններին ֆոնին, երբ Վրաստանի վարչապետ Իրակլի Ղարիբաշվիլին հայտարարեց, որ մինչեւ տարվա վերջ այդ երկաթուղով պետք է առաջին գնացքն անցնի, միանգամից Ասկերով նման հայտարարություն է անում: Մենք շատ լավ գիտենք ադրբեջանական պետության կերտվածքը. եթե դա համաձայնեցված չէ բարձրագույն ղեկավարության հետ, նույնիսկ հավաքարարը իրավունք չունի հայտնել սեփական կարծիքը: Ասկերովի հայտարարությունը ադրբեջանական ղեկավարության դիրքորոշումն է», - հայտարարեց Չախալյանը:
Այսինքն, ադրբեջանական կողմը որոշում է, որ հայկական գնացքները չեն կարող երթեւեկել այս երկաթուղով, քանի դեռ լուծված չէ ղարաբաղյան հարցը: Նրանք բոլոր միջոցներով փորձում են հասնել դրան: Ես համոզված եմ, որ Միխայիլ Սահակաշվիլիի հետ նրանք ներքին համաձայնություն են ունեցել, եւ այդ պայմանավորվածությունները կփորձեն փաթաթել Վրաստանի նոր իշխանություններին՝ տնտեսական ճնշման միջոցով: Սակայն այստեղ շատ կարեւոր է նաեւ ջավախահայերի դիրքորոշումը: Մենք Վրաստանի քաղաքացիներ ենք, մենք մեր ձայնը տվել ենք ներկայիս իշխանությոններին եւ թույլ չենք տա, որ Ադրբեջանի իշխանությունները որոշեն նրանց փոխարեն», - ընդգծեց Վահագն Չախալյանը: Միջազգային իրավունքի ոչ մի սկզբունք Ադրբեջանին իրավունք չի տալիս նմանատիպ արգելք մտցնել, առավել եւս Վրաստանի տարածքում:
Հիշեցնենք, որ հոկտեմբերի 23-ին, ԱՊՀ-ի եւ Բալթյան երկրների երկաթուղային տրանսպորտի հարցերի խորհրդի 61-րդ նիստի ընթացքում «Ադրբեջանական երկաթուղիներ» ընկերության ղեկավար Արիֆ Ասքերովը հայտարարել է. «Հայաստանի միացումը Բաքու-Թբիլիսի-Կարս երկաթուղուն հնարավոր է քննարկել միայն ԼՂ խնդրի կարգավորումից հետո: Այս փուլում նախագծին կարող են միանալ բոլոր ցանկացող կողմերը, բացառությամբ Հայաստանի»:
