Ազգային ժողովի նախկին պատգամավոր, Հանրապետական կուսակցության անդամ Հակոբ Հակոբյանը՝ Ճոյտը, ողջունում է Գագիկ Ծառուկյանի գործունեությունը եւ հնարավորության դեպքում կմասնակցի եռյակի հանրահավաքին: Այս մասին NEWS.am-ի թղթակցի հետ զրույցում ասաց Հակոբ Հակոբյանը:
Նա նշեց, որ այժմ խիստ զբաղված է Ցեղասպանության մասին ֆիլմի նկարահանման աշխատանքներով, մտադիր են այն մինչեւ տարեվերջ ավարտել եւ արդեն փետրվարին հանձնել հանդիսատեսի դատին: Զբաղված լինելով ստեղծագործական գործունեությամբ՝ նա չի կարողանում մանրամասն հետեւել քաղաքական իրադարձություններին, բայց ողջունում է եռյակի գործունեությունը, »ցանկացած միջոցառում, որը օգուտ կբերի ժողովրդին պետության, ողջունում եմ, անկախ նրանից՝ ով է դա կազմակերպում»:
Նախկին պատգամավորը առանձնակի հիացմունքով է արտահայտվում Գագիկ Ծառուկյանի մասին, ում տեսնում է ընդդիմադիր դաշտում: «Մարդը բացահայտ ընդդիմանում է, սխալների մասին է բարձրաձայնում, գնահատականներ է տալիս, ընդդիմանում է այսօրվա վարած քաղաքականությանը, ի՞նչ կապ ունի, որ նախկինում իշխանության մաս էր այսօրվա իշխանությունը կարող է վաղը դառնալ ընդդիմություն եւ հակառակը: Ծառուկյան Գագիկը շատ մեծ քաղաքական գործիչ է, իր կյանքով ապացուցել է, որ ինքը կարող ուժ է եւ կարող է իր հետեւից տանել մարդկանց, որոնք մտահոգված է: Իր ապրած ժամանակով ինքը ապացուցել է, որ կարող է ամեն ինչ անել եւ անում է, ինչո՞ւ չհավատալ մարդուն, լավ գործեր է անում, տեսեք՝ սպորտը ինչ զարգացում է ապրում: Ես կարող էի մասնակցել հանրահավաքին, նման խնդիր չկա իմ առջեւ դրված, Ծառուկյանի հետ հանդիպել ենք 3-4 ամիս առաջ ոչ քաղաքական հարցերով, ընտրությունների ժամանակ էլ ես բոլոր կուսակցության շտաբերի հետ հանդիպում եմ: Իսկ ինչի՞ չմասնակցեմ այդ հանրահավաքներին, այնտեղ որեւէ վատ առաջարկություն, որեւէ վատ բան, որ վնաս կբերի մեր ժողովրդին, լսե՞լ ենք այդ մարդկանցից»,-ասաց ՀՀԿ անդամը: Նախկին պատգամավորը ԲՀԿ առաջնորդին տեսնում է նաեւ նախագահի պաշտոնում, «մեր երկրում շատ նախագահներ կա, եթե Գագիկ Ծառուկյանը նախագահի թեկնածու լինի, ես միայն կողջունեմ»:
Առաջիկայում, եթե պետք եղավ, ինքը եւս կմասնակցի հանրահավաքին, «ցանկացած մարդ, ով այսօր փորձում է ակտիվ հասարակական, քաղաքական գործունեությամբ զբաղվել, միայն ողջունում է, որեւէ վատ բան չի տեսնում»: Հարցին, թե ձեր ՀՀԿ գործընկերները վատ չեն վերաբերի իր մասնակցությանը, նա այսպես հակադարձեց. «Այդտեղ ի՞նչ կա, ես դրա մեջ որեւէ վատ բան չեմ տեսնում: Դուք մտածում եք իմ գործընկերները չե՞ն մասնակցում: Մի մասը մասնակցում է տեղում ներկա լինելով, մյուս մասը իմանում է թերթրեից, հեռուստատեսությունից, չի կարող մարդիկ լինել, որ քաղաքականության մեջ են եւ նման դեպքերում մանրամասն չնայեն: չվերլուծեն»,-նշեց ՀՀԿ անդամը:
Նախկին պատգամավորը շեշտեց, որ պետք է լավին լավ, վատին վատ ասել եւ ամրապնդել հասարակության վերահսկողությունը, որպեսզի մարդիկ ավելի զգոն եւ լավ աշխատեն: