Ֆրանսիայի նախագահ Ֆրանսուա Օլանդը կընդունի Հայաստանի եւ Ադրբեջանի նախագահներին այն ժամանակ, երբ Եվրոպան նոր քայլ է կատարում, որպեսզի վերջ դնի երկար շարունակվող հակամարտությանը Լեռնային Ղարաբաղի շուրջ: Այդ մասին նշվում է «France Presse» գործակալության հոդվածում, որը նվիրված է Փարիզում նախագահների հանդիպմանը:
Հոդվածում նշվում է, որ Գերմանիայի ԱԳ նախարար Ֆրանկ Վալտեր Շտայնմայերն անցյալ շաբաթ այցելել է Հայաստան ու Ադրբեջան՝ Ուկրաինայի պատերազմի ֆոնի վրա վերջին ամիսներին բռնության կտրուկ սրումից հետո:
Թեեւ որոշ փորձագետներ առաջընթաց են սպասում 20 տարվա արյունահեղությունից հետո, «կարեւոր է հավաքել նախագահներին, որպեսզի կոչ անեն միասին աշխատել, վերադառնալ բանակցությունների սեղանի շուրջ՝ լարվածությունը մեղմացնելու համար», գրում է գործակալությունը՝ վկայակոչելով Փարիզում առկա աղբյուրին: «Ուկրաինայում կատարվածն ուղղակի ազդեցություն ունեցավ հակամարտության վրա»,- հայտարարել է աղբյուրը, ով մտերիմ է Օլանդի հետ եւ հավելել, որ «Ղրիմի անեքսիան Ռուսաստանի կողմից սրեց իրավիճակը»:
Ֆրանսիացի դիվանագետը ճանաչել է, որ Օլանդին դժվարություններ են սպասվում իր ջանքերում՝ ուղղված Հայաստանի եւ Ադրբեջանի միջեւ երկխոսությանը: «Զարմանալի կլիներ, եթե հստակ առաջընթաց լիներ: Սակայն նախագահ Օլանդի կամքը կա հասնել առաջընթացի, որպեսզի կողմերի միջեւ երկխոսություն կայանա»,- նշել է դիվանագետը:
Ընդ որում հոդվածում նշվում է, որ Օլանդը ստիպված կլինի առնչվել Արդբեջանում մարդու իրավունքների վատ իրավիճակի հետ, որտեղ տասնյակ քաղբանտարկյալներ կան, կառավարությունը հաշվեհարդար է տեսնում ընդդիմադիրների հետ այն բանից հետո, երբ անցյալ տարի Ալիեւը երրորդ անգամ նախագահ ընտրվեց: