Հնդկական Չհատիսգարհ նահանգում «վհուկին» չիլի պղպեղով տանջելով մահվան են հասցրել: Ըստ France Presse գործակալության, 55-ամյա այրուն հանգուցյալ ամուսնու ազգականները կասկածել են կախարդությամբ եւ սեւ մոգությամբ զբաղվելու մեջ:
Ոստիկանության տվյալներով, կոնֆլիկտի պատճառ է դարձել «վհուկի» զարմիկի հիվանդությունը: Հարազատները հավաքվել են նրա տան մոտ՝ պահանջելով, որպեսզի նա հանի անեծքը: Երբ կինը հայտարարել է, որ անմեղ է, ամբոխը հարձակվել է նրա վրա եւ սկսել մահակներով, բռունցքներով եւ ոտքերով ծեծել: Այնուհետեւ նրա աչքերի, ականջների մեջ եւ ինտիմ հատվածների վրա աղացած չիլի պղպեղ են լցրել:
«Վհուկի» 28-ամյա որդին մորը հիվանդանոց է հասցրել, որտեղ բժիշկները մահ են արձանագրել: Ոստիկանությունը դատաստանին մասնակցած 12 մարդու է ձերբակալել, այդ թվում՝ հինգ կնոջ:
Lenta.ru-ի փոխանցմամբ՝ հնդկական իրավապաշտպանների տվյալներով, Չհատիսգարհում ամեն տարի շուրջ հարյուր «կախարդների» են տանջում եւ սպանում: 2005 թվականին նահանգում օրենք են ընդունել, որի համաձայն՝ «վհուկների որսորդներին» կարող են մինչեւ 5 տարվա ազատազրկման դատապարտել: Չնայած դրան, կախարդության մեջ կասկածվողների վրա հարձակումների թիվը չի նվազում: