Այժմ աշխարհում ամենաբարակ հեռախոսն է Gionee Elife S5.1-ը, որի կորպուսի հաստությունը 5,1 մմ է: Սակայն դրան կարող է փոխարինել Vivo ընկերության հեռախոսը, փոխանցում է 3Dnews-ը:
Նոր սուպերբարակ հեռախոսի հաստությունը 3,8 մմ է, եւ ըստ կայքի, այդ ցուցանիշը հազիվ թե որեւէ մեկը կարողանա գերազանցել առաջիկայում:
Աղբյուրը լուսանկարներ է հրապարակում, որոնք հայտնվել են Weibo չինական սոցցանցում: Լուսանկարներում Vivo ընկերության նոր սմարթֆոնը դրված է iPhone 5s-ի կողքին, որի հաստությունը 7,6 մմ է: Ըստ լուսանկարի` աշխարհում ամենաբարակ սմարթֆոնի հավակնորդը երկու անգամ բարակ է Apple-ի 2013 թ. արտադրանքից:
Կայքը նշում է, որ չինական աղբյուրները Vivo սմարթֆոնի վերաբերյալ բնութագրական տվյալներ չեն տրամադրել: