Ֆիզկուլտուրայի դասաժամին այսօր՝ հոկտեմբերի 29-ին մահացած՝ ԵՊՀ Կիրառական մաթեմատիկայի երկրորդ կուրսի ուսանող Լեւոն Արամի Հայրապետյանը սրտի բնածին արատ ուներ։
«Իր մոտ սրտի աորտալ ատենոզ բնածին փականային եւ վերփականային արատ է եղել: Մենք իրեն ուղարկել ենք բուժական ֆիզկուլտուրայի դասերին մասնակցելու, բայց ինքը դա թաքցրել է եւ գնացել ընդհանուր ֆիզկուլտուրայի դասերին: Նրա անկետայում նշված է եղել հիվանդությունը, սակայն նա դա բոլորից թաքցրել է: Դա այնպիսի հիվանդություն է, որ երեխան կարող էր նաեւ երթուղայինում կամ մաթեմատիկայի դասաժամին վատանալ»,- NEWS.am-ին ասաց ԵՊՀ բուժկետի բժշկուհի Էլլա Սեդրակյանը՝ ավելացնելով, որ երբ բուժկետի բժիշկները գնացել են մարզադահլիճ, Լեւոնն արդեն մահամերձ է եղել:
ԵՊՀ Ինֆորմատիկայի եւ կիրառական մաթեմատիկայի դեկանի տեղակալ Գևորգ Ասլամաջյանը NEWS.am-ի հետ զրույցում նույնպես հաստատեց, որ Լեւոնը ֆիզկուլտուրայի դասախոսից թաքցրել է իր հիվանդությունը. «Դասի ժամին ֆուտբոլ են խաղացել։ Ինքը վատացել է, դասախոսին խնդրել, գնացել դարպասապահ է կանգնել, հետո վատ է զգացել, ընկել: Մենք ամեն տարի առաջին կուրսեցիներին ուղարկում ենք բուժկետ զննության, ինքը թուղթն ունեցել է, բայց բոլորից թաքցրել է»։
Լեւոն Հայրապետյանի հիվանդության մասին տեղյակ չեն եղել նաեւ համակուրսեցիները:
«Ինքը շատ ընկերասեր, բարի մարդ էր: Ուղղակի որ այդպիսի խնդիր է ունեցել, վատ է զգացել, որ ասի»,- ասաց Լեւոն Հայրապետյանի համակուրսեցի Գարեգին Քալաշյանը՝ ավելացնելով, որ Լեւոնը շատ լավ է սովորել եւ դասախոսների սիրելին եղել։
ԵՊՀ ֆիզկուլտուրայի ամբիոնում ցնցված էին կատարվածից, մինչեւ այսօր նրանք տեղյակ չեն եղել, որ Լեւոնը որեւէ առողջական խնդիր ունի։
«Ինքը փոքր ժամանակ ֆուտբոլի է գնացել անգամ: Մենք չենք էլ իմացել, որ նա սրտի հետ կապված խնդիր է ունեցել: Մեզ ոչ մի թուղթ չի բերել, մեր ամբիոնի մատյանում նման բան չի գրանցվել: Իսկ ծնողներին, որ զանգել, ասել են՝ եկեք, ձեր երեխան վատացել է, պատասխանել են, թե՝ գիտենք, նա սրտի հետ կապված խնդիր ունի»,- NEWS.am-ի թղթակցի հետ զրույցում ասաց ամբիոնի վարիչ Սարգիս Սանդրոսյանը։
19-ամյա Լեւոն Հայրապետյանը Արագածոտնի մարզի Օշական գյուղից էր, տան երեք երեխաներից ավագը։
«Շատ լավ սովորող երեխա էր, լավ ընտանիքից, ծնողները՝ բարձրագույն կրթությամբ։ Շատ ենք ցավում կատարվածի համար»,- մեզ հետ զրույցում ասաց Օշականի գյուղապետ Արամ Ներսիսյանը՝ նշելով, որ ինքը նույնպես տեղյակ չէր Լեւոնի հիվանդության մասին։
Քննչական կոմիտեից մեզ հայտնեցին, որ կատարվածի առնչությամբ նախապատրաստվում են նյութեր։