Հետազոտողները վերակենդանացրել են 700-ամյա վիրուսը, որը հայտնաբերել են կանադական եղջերուի կղկղանքում: Գիտնականներն ասում են, որ իրենց բացահայտումը ցուցադրում է գլոբալ ջերմացման արդյունքում հնագույն այլ վիրուսների վերադարձի հնարավորությունը:
Ամերիկացի հետազոտողներն իրենց աշխատանքի կարեւորությունը բացատրել են հնագույն վիրուսների ուսումնասիրման անհրաժեշտությամբ, որպեսզի երբ դրանք նորից վերադառնան, մարդկությունը դրանց դիմակայելու համար արդյունավետ պատվաստանյութ ունենա: Այդ վիրուսներից մի քանիսը հարյուրամյակների պատմություն ունեն եւ, ամենայն հավանականությամբ, դրանցով վարակված են եղել բույսերը, որոնցով սնվել են եղջերուները:
«Մեր ստացած տվյալներն ապացուցում են, որ վիրուսները ցուրտ պայմաններում կարող են ապրել անհավանականորեն երկար ժամանակ»,- ըստ Mail Online-ի՝ լրագրողներին հայտարարել է Սան Ֆրանցիսկոյի գիտահետազոտական ինստիտուտի հետազոտող Էրիկ Դելվարտը:
Նրա թիմը վերլուծել է վիրուսային գենետիկ նյութը, որը եղել է Կանադայի լեռների սառույցներից վերցված նմուշում: Հյուսիսային եղջերուները հավաքվում են ցուրտ վայրերում՝ միջագտներից եւ ամռան տապից խուսափելու համար: Ցածր ջերմաստիճանի շնորհիվ նրանց կղկղանքը լավ պահպանվել է: Դրանում հետազոտողները հայտնաբերել են մասամբ մարսված բուսական նյութ:
Մասնագետները 700-ամյա սառցե շերտից առանձնացրել են վիրուսի ԴՆԹ-ի գենը, որը հեռավոր կապ է ունեցել վիրուսով վարակված բույսերի եւ սնկերի ու մասամբ վիրուսի գենի հետ: Կղկղանքի նմուշում հայտնաբերված վիրուսային նյութը ենթադրում է, որ այն, ամենայն հավանականությամբ, գոյություն է ունեցել եղջերուների կերած բույսերում կամ թռչող միջատներում:
Ըստ FedPost.ru-ի, օգտագործելով գենետիկայի հետադարձ մոտեցումը՝ հետազոտողները վերականգնել են վիրուսի ԴՆԹ-ի գենոմը, որպեսզի ապացուցեն բույսերին վարակելու վիրուսի ունակությունը: Այնուհետեւ նրանք այդ վիրուսներով վարակել են ժամանակակից բույսերը եւ հայտնաբերել, որ վիրուսը հաջողությամբ գոյատեւել է: