Կենտրոնական բանկում այսօր տեղի է ունեցել մտադրությունների վերաբերյալ հուշագրերի ստորագրման արարողություն, որին մասնակցում էին ԿԲ նախագահ Արթուր Ջավադյանը, շվեյցարական «Ֆրանկ Մյուլլեր» ընկերության հիմնադիր, «Արմսվիսսբանկի» եւ «Թեքնոսերտ» ընկերության խորհրդի նախագահ Վարդան Սիրմաքեշը, ՀՀ-ում Շվեյցարիայի արտակարգ եւ լիազոր դեսպան Լուկաս Գասսերը, ՀՀ-ում Լիբանանի արտակարգ եւ լիազոր դեսպան Ժան Մակարոնը եւ այլք:
ԿԲ մամուլի ծառայությունից հայտնում են, որ Կենտրոնական բանկի եւ «Թեքնոսերտ» ընկերության միջեւ ստորագրվեց Հայաստանում թանկարժեք մետաղների (հիմնականում ոսկու եւ արծաթի) զտարկման (աֆինաժի) գործարանի ստեղծման վերաբերյալ Մտադրությունների մասին հուշագիր:
Գործարանի գործունեության հիմնական նպատակն է հանդիսանալու 999.9 հարգի բանկային ստանդարտացված ձուլակտորների արտադրությունը եւ վաճառքը Հայաստանում եւ միջազգային շուկայում՝ Հայաստանում արդյունահանվող ոսկու եւ արծաթի հանքանյութի (խտանյութի) մշակումով: Գործարանի ստեղծմանն ու հետագա կառավարմանը պետք է ներգրավվեն տվյալ ոլորտում միջազգային փորձ եւ հեղինակություն վայելող ընկերություններ:
«ԱՐՄՍՎԻՍԲԱՆԿ» ՓԲԸ-ի եւ «ՄԵՆԵՋՄԵՆԹ ՄԻՔՍ» ՍՊԸ-ի միջեւ ստորագրվեց Մասնավոր ներդրումների կառավարման գործունեություն իրականացնող ընկերություն հիմնադրելու վերաբերյալ Մտադրությունների մասին հուշագիրը:
Ընկերության հիմնական առաքելությունն է լինելու ներդրողներին ՀՀ-ում եւ ՀՀ տարածքից դուրս ստեղծվող կամ գործող մասնավոր առեւտրային ընկերությունների կապիտալում ներդրումներ կատարելու, այդպիսի ներդրումները կառավարելու եւ հետագայում դրանց օտարումը կազմակերպելու գործում համալիր ծառայությունների մատուցումը:
Ընկերության հիմնական ջանքերն ուղղված են լինելու գործընկեր հանդիսացող առեւտրային ընկերությունների գործունեության ընդլայնմանը, մասնավորապես՝ տնտեսության տարբեր ոլորտներում աճի պոտենցիալ ունեցող գործարար ծրագրերի բացահայտմանը, դրանց գնահատմանը եւ իրականացմանը:
Նորաստեղծ ընկերությունը կնպաստի շուկայում նոր մշակույթի ձեւավորմանը, այն է մասնավոր ակտիվների կառավարումը, որն իր մեջ կամփոփի ընկերությունների կորպորատիվ կառավարման, բիզնեսի զարգացման, մրցունակության բարձրացման, նոր շուկաների ստեղծման տարրեր:
Արարողության մասնակիցները բարձր են գնահատել եւ կարեւորել են ստորագրված փաստաթղթերի հիման վրա ստեղծվելիք ընկերությունների դերն ու նշանակությունը Հայաստանի տնտեսության զարգացման, օտարերկրյա եւ մասնավոր ներդրումների խթանման գործում:
Նշվել է, որ թանկարժեք մետաղների զտարկման գործարանի գործարկումը հնարավորություն կտա էականորեն բարձրացնելու Հայաստանում ոսկու արդյունահանման եւ զտարկման ծառայությունների արդյունավետությունը: Կենտրոնական բանկի նշված նախաձեռնությունը առավել քան կարեւորվում է՝ հատկապես հաշվի առնելով ոսկու ներդրումային նշանակությունը որպես կարեւոր պահուստային գործիք եւ ներդրումային պորտֆելի դիվերսիֆիկացման միջոց:
Մասնավոր ներդրումային ֆոնդի հիմնադիրների հավաստմամբ կարեւորվելու են նորարարություններ եւ նոու–հաու (know-how) տեխնոլոգիաներ պարունակող ներդրումային ծրագրերը: Հարկ է նշել, որ այս նախաձեռնությունը կծառայի միջազգային ֆինանսական միջոցների ներգրավմանը: Դրա մասին է վկայում այն, որ առկա ներդրումային ֆոնդերը ձեւավորվել են արտերկրյա մասնավոր ներդրողների եւ միջազգային ֆինանսական ընկերությունների միջոցներով: