«Ազգային անվտանգություն» կուսակցության ղեկավար Գառնիկ Իսագուլյանը միացել է եռյակին եւ մասնակցում է նրանց հանրահավաքներին: Այս մասին NEWS.am-ի թղթակցի հետ զրույցում ասաց Գառնիկ Իսագուլյանը:
Նա նշեց, որ ինքը եւ իր կուսակիցները լինում են Ազատության հրապարակում, ոչ հարթակում, իսկ հարթակից ելույթ ունենալը համարում է շատ պատասախանատու, «շատ հարցեր կան, որոնք ճշտման կարիք ունեն»: Թե երբ կլինի հաջորդ հանրահավաքը, Գառնիկ Իսագուլյանն ասաց, որ իրենք եռյակի ներքին խոհանոցային խնդիրների հետ չեն առնչվում: Ինքը անձամբ հանդիպումներ ունենում է Գագիկ Ծառուկյանի հետ, մյուս երկու առաջնորդների հետ չի հանդիպել, բայց չի կարծում, թե ցանկության դեպքում դրանք չեն կայանա: Նա շեշտեց, որ Գագիկ Ծառուկյանն է նոր քաղաքական մշակույթ ներմուծողը, շարժման լոկոմոտիվը, «մեծահարուստ, լավ գործարար, ով կարողացավ հասկանալ, որ առանց ուժեղ պետականության չկա լավ բիզնես դաշտ»: Եռյակի հետ համագործակցելու ընթացքում Գառնիկ Իսագուլյանը հանդիպումներ ունեցել է նաեւ երկրորդ նախագահ Ռոբերտ Քոչարյանի հետ, վերջին անգամ նրա հետ հանդիպել է մոտ օրերս, սակայն չցանկացավ ասել՝ քննարկել են եռակի գործունեությունը, թե ոչ:
«Ազգային անվտանգություն» կուսակցության ղեկավարը շեշտեց, որ Հայաստանի իշխանությունները վարել են այնպիսի արտաքին եւ ներքին քաղաքականություն, որ երկիրը կանգնել է ծանր վիճակի առաջ: Այդ պատճառով էլ իրենք դեմ են այս իշխանություններին եւ քանի դեռ նրանք շարունակեն նույն կերպ, ոչ միայն իրենք իրենց են վնաս տալու, այլեւ պետականությանը:
Գառնիկ Իսագուլյանը շեշտեց, որ նախեւառաջ պետք է իշխանությունը վերադարձնել ժողովրդին, բռնապետությունը այլ բռնապետությամբ, մեկ այլ անձով փոխարինելը ինքը անընդունելի է համարում: