Հայաստանում հնդիկ ուսանողն ինքնասպանություն է գործել, ամենայն հավանականությամբ, դեպրեսիայի պատճառով, քանի որ չնայած դատական որոշմանը՝ Հնդկական բանկը հրաժարվել է կրթական վարկ տրամադրել: Ըստ «Deccan Chronicle»-ի, ուսանողի հայրը ոստիկանություն բողոք է ներկայացրել Թամիլնադ նահանգի Կրիշնահարի շրջանի Պոչամպալի քաղաքի Հնդկական բանկի պաշտոնատար անձանց դեմ, որոնք հրաժարվել են վարկ տրամադրել:
Պարբերականը նշում է, որ Երեւանի պետական բժշկական համալսարանի երրորդ կուրսի ուսանող, 23-ամյա Պ.Կաննադասանը մի քանի օր առաջ ինքնասպանություն է գործել: Տղայի հայրը պատմել է, որ Հայաստան է ուղեւորվել գործակալության միջոցով, որն անվճար բժշկական կրթություն է գովազդել ընդունելության քննությունները հանձնած ուսանողների համար: Սակայն Կաննադասանին ընդունելուց հետո համալսարանը տարեկան 5.000 դոլար ուսման վարձ է պահանջել:
Երիտասարդի հայրը վաճառել է ընտանեկան կալվածքն ու վճարել առաջին տարվա ուսման համար: Երկրորդ տարում տղային օգնել են ընկերները, քանի որ Հնդկական բանկի մասնաճյուղն ուշացրել է կրթական վարկի տրամադրումը:
