Apple ընկերությունը իրանական շուկա մուտք գործելու հնարավորության վերաբերյալ նախնական բանակցություններ է վարում Իրանի մատակարարների հետ, փոխանցում է The Wall Street Journal-ը՝ վկայակոչելով իրազեկ աղբյուրները:
Ըստ թերթի՝ Իրանի շուկա մտնելու որոշումը կախված կլինի այդ երկրի դեմ արեւմտյան պատժամիջոցներից:
Apple-ի ղեկավարները, ըստ հրատարակչության, ընկերության տարածաշրջանային գրասենյակում՝ Լոնդոնի Հաննովեր սթրիթում, հանդիպել են իրանցի պոտենցիալ գործընկերների հետ: Իրանում, ենթադրաբար, ոչ մեծ առեւտրային կետեր կբացվեն, որոնք Apple-ի արտադրանքը կվաճառեն ֆրանշիզով:
Ընկերությունը բիզնեսի այդ մոդելը կիրառում է Եվրոպայում եւ Ասիայում: Իրանի շուկա մուտք գործելը, նշում է թերթը, արեւմտյան ցանկացած ընկերության համար նախկինի պես կապված է խոչընդոտների հետ:
